पःखाः ह्वखनाः निम्ह कैदी फरार

येँ (सन्ध्या टाइम्स)/सुर्खेत जेलं थौं सुथय् निम्ह कैदी पःखाः ह्वखनाः बिसिउँ वंगु दु। अपहरण, शरीर बन्धक व जबर्जस्ती करणी मुद्दाय् अन कुनातःपिं निम्ह कैदीत जेलया पश्चिमपाखे लाःगु सुरक्षा पोष्ट लिकसं च्वंगु पःखाः ह्वखनाः थौं सुथय् ६ बजे बिसिउँ वंगु खः ।

अपहरण व शरीर बन्धक मुद्दा लानाच्वंम्ह विजयविक्रम शाह व जबर्जस्ती करणी मुद्दा लानाच्वंम्ह पुनबहादुर शाही अनं बिसिउँ वंगु खँ सुर्खेतया सीडीओ हरिकृष्ण पौडेलं कनादीगु दु ।

सुर्खेतया लेखगाउँलय् छेँ दुम्ह शाहया निगू मुद्दा मध्ये हातहतियार खरखजानाय् स्वदँया कैद सजाय फैसला जूगु व अपहरण नापं शरीर बन्धकया मुद्दाय् कुनातःगु खः।
हुम्ला अदालतं जबर्जस्ती करणी मुद्दाय् च्यादँया कैद सजाय व नीन्याद्वः तका बं पुइकातःम्ह शाही निदँ न्ह्यवंनिसें सुर्खेत जेलय् च्वनाच्वंम्ह खः। हिमाल तराई टाइगर्स नांगु भूमिगत संगठनया नामं लुटपाट याःगु द्वपनय् विजयविक्रम शाह नापं खुम्हेसित माघ १३ गते ज्वंगु खः ।

शाह नापं चन्दा व व्यापारिक प्रतिष्ठानय् प्रेसर कुकर बम तःम्ह निरीक्षक मिनबहादुर शाही नापं २० म्ह सुरक्षाकर्मीयात निलम्बन याःगु दु। घटनाया छानवीन यायेत जिल्ला प्रशासन कार्यालयपाखें सहायक प्रमुख जिल्ला अधिकारी हरि प्याकुरेलया संयोजकत्वय् प्रहरी नायव उपरीक्षक आनन्दप्रसाद मराठा, प्रमुख अनु सन्धान अधिकृत योगेन्द्र केसी व प्रशासकीय अधिकृत बुद्धिप्रसाद सापकोटा दुजः दुगु छानवीन समिति गठन याःगु दु।
वइगु न्हय्न्हुया दुने प्रतिवेदन पेश यायेत समितियात निर्देशन बिउगु दु ।