सु खः ?

महाकवि गिरिजा प्रसाद जोशी

ख्वय्वं घाः जिगु लनिमखु अय्सां
ख्वय्फत धाय्वं ख्वइम्ह जि खः
वय्वं नापलाय् खनिमखु अय्सां
वय्फत धाय्वं वइम्ह जि खः
स्वय्वं प्यपुना वइमखु अय्सां
स्वय्फत धाय्वं स्वइम्ह जि खः
च्वय्वं पौ जिगु थ्यनिमखु अय्सां
च्वय्फत धाय्वं च्वइम्ह जि खः
ह्वय्वं भंबः वइमखु अय्सां
ह्वय्फत धाय्वं ह्वइम्ह जि खः

पन्यवं पंका च्वनिमखु अय्सां
पन्यफत धाय्वं पनिम्ह व खः
कुन्यवं कुंकाः च्वनिमखु अय्सां
कुन्यफत धाय्वं कुनिम्ह व खः

वइन म्हसीकाः,जितः म्हसीकाः
मानवता थन हइम्ह सु खः ?
भेद म्हसीकाः,भाव म्हसीकाः
समानता थन हइम्ह सु खः ?

शोषण खंकाः,अंन्याः तंकाः
कंझाः चिइकाः छ्वइम्ह सु खः ?
खः व छ हे खः,खः व जि हे खः
छ व जि व जाय्वं वइम्ह व खः

More Stories Like this