किपुली नेवाः राज्य ज्याकूयात नपाया बजेट
किपू(सन्ध्या टाइम्स)/ नेवाः स्वायत्त राज्य मंकाः परिषद् किपूया ज्याकू संचालनया नितिं माःगु व्यवस्था यायेत किपू नगरपालिकाया नकतिनि क्वचाःगु नगरपरिषदं ३ लाख तका ध्यबा बीगु जूगु दु ।
किपू नगरपालिकाया ध्वाकासि त्वालय् द्यःलातय्गु लागाय् च्वंगु सामुदायिक भवनय् मंकाः परिषद्या ज्याकू संचालन यायेगु निंतिं माःगु ब्यवस्था यायेत धकाः अथे ध्यबा फ्याःगु खः ।
अथे हे नगर परिषदं किपूया त्वाः व थाय्बाय्या नां नेवाः लिपिं साइनबोर्ड तयेगु नितिं धकाः ४ लाख तका अले स्थानीय भाषा विकासया निंतिं धकाः नेपालभाषा विकासया निंतिं ३ लाख तका ध्यबा फ्याःगु दु ।
वंगु शुक्रवाःनिसें शनिवाः चान्हय् तक च्वनाः क्वचाःगु किपू नगरपालिकाया नगर परिषदं नेवाः स्वायत्त राज्य मंकाः परिषद्, नेवाः भाय् व नेवाःतय्गु नितिं ध्यबा फ्याःगु खः। अथे हे किपूया नेवाः सम्पदा संरक्षण सम्वर्द्धनया निंतिं नं ध्यबा फ्याःगु दु। नेवाःतय्गु पुलांगु बस्तीयात माःगु पूर्वाधार तयार यायेत प्राथमिकता बीगु प्रस्ताव नं नगरपरिषदं पारित याःगु दु ।
वंगु दँया नगर परिषदं नेवाः स्वायत्त राज्य मंकाः परिषद् किपूया भौतिक सामानया नितिं २ लाख तका अनुदान बीगु निर्णय याःगु खःसा उगु ध्यबां परिषद्या निंतिं माःगु भौतिक सामाग्री न्यायेधुंकूगु दु। किपुली नगरपरिषद्य् एकीकृत माओवादी, नेपाली कांग्रेस, एमाले व नेमकिपा दुथ्याकातःगु दुसा नेपाः राष्ट्रिय पार्टीं नं थःपिनि प्रतिनिधित्व दयेमाः धकाः माग याना वयाच्वंगु दु ।
