मायोज चाउचाउ कारखाना मिं नयाः करोडौं क्षति
येँ (सन्ध्या टाइम्स)/काभ्रे जिल्लाया बनेपाय् च्वंगु मायोज चाउचाउ कारखानाय् थौं सुथय् मिं नयाः करोडौं तका बराबरया धनमाल क्षति जूगु दु ।
बनेपाया उग्रतारा जनगाल लागाय् च्वंगु मायोज कारखानाय् थौं सुथय् १० बजे जुयाः ३५ मिनेट वंगु इलंनिसें मिं नयेगु सुरु जूगु खः। कारखानाय् च्यानाच्वंगु मि नियन्त्रणय् कायेगु नितिं येँ, यल व ख्वपया दमकल वनेमाःगु खः ।
अन दमकलया लः फूसां नं मि नियन्त्रणय् काये मफुगुलिं कारखानाय् हे स्टोर यानातःगु लखं मि स्यायेगु कुतः याःगु दु। दमकलया लः फुइधुंकाः नं मि स्याये मफुगुलिं उगु लागाय् छगू कथं झन तनावपूर्ण लकस ब्वलंगु खँ स्थानीय भयभीत मनूतय्सं धाःगु दु। स्थानीय मनूतय्सं धाः कथं मायोज कारखानाया स्टोर रुमंनिसें मिं नयेगु सुरु जूगु खः। लिपा वहे मि तःधं जुया वनाः कारखाना छगुलिं न्यनावंगु खः ।
मिं नयेवं कारखानाया फुक्क हे मजदुरत पिहां वःगुलिं मानवीय क्षति धाःसा जुइ मलात। मिं नःगु इलय् नं कारखाना दुने आपालं मजदूरत ज्या यानाच्वंगु खः।
घटना लिपा घटनास्थल व क्षतिया निरीक्षण यायेत काभ्रे जिल्लाया प्रमुख जिल्ला अधिकारी रुद्रनाथ बस्याल, राष्ट्रिय अनुसन्धान विभागया काभ्रे प्रमुख कुलदेव थापा, जिल्ला प्रहरी प्रमुख सुरेन्द्र मैनाली उखे वंगु दु। मिं नयाः कारखानाया करोडौं तूगु मेसिन क्षति जूगु अनुमान याःगु दु ।
मि इलय् हे नियन्त्रणय् काये मफुगुलिं उगु लागाया जःखः च्वंगु छेँ नापं च्याइ धकाः गुलिखे छेँ बहुमूल्य सामान ल्ह्ययाः खाली यायेगु ज्या समेत सुरु जुइधुंकूगु खः। ११ बजेनिसें हे मि नियन्त्रणय् कायेत प्रहरी, सशस्त्र प्रहरी व स्थानीयवासीत सक्रिय रुपं लगे जूगु दु। मिं नयाः पाय्छि थुलि हे क्षति जुल धकाः ल्याःचाः पिमकाःनिसां करोडौंया नोक्सान जूगु अनुमान दु ।
