पार्टी महाधिवेशनय् वनी : सापकोटा

येँ (झीगु स्वनिगः)

सूचना लिसे सञ्चार मन्त्री अग्नीप्रसाद सापकोटां पार्टीदुनेया विवाद समाधानया नितिं मंगलवाःनिसें न्ह्याइगु केन्द्रीय कमिटीया बैठकं महाधिवेशनय् वनेगु निर्णय याइगु धयादिल । आइतवाः येाय् ग्वसाः ग्वःगु छगू साक्षात्कारय् न्वंवानादिसें वय्कलं थज्याःगु खाया जानकारी ब्यूगु खः । पार्टी पोलिटव्युरो दुजः नापं जुयाः च्वनादीम्ह सापकोटां छगू ब्यागलं प्रसंगय् लिपांगु इलय् थःदथुइ लानाच्वंगु द्वपं रक्तचन्दन तस्करी याये मखंपिनिगु प्रचार खः धयादिसें थःम्हं कोदारी राजमार्गपाखें जुइगु रक्तचन्दनया तस्करी पनेत गृहमन्त्री, प्रहरी प्रमुख, प्रमुख जिल्ला अधिकारी लगायतलिसे सहलह याना च्वनागु जानकारी बियादीगु खः । वय्कलं पार्टीदुनेया नितान्त खायात पिने हःगु विषयलय् छानबिन यानाः दोषी कार्यकर्तादथुइ कारबाही यायेगु ख्याच्वः नापं बियादिल ।

सञ्चार मन्त्री सापकोटां छगू दशक तक्क निरन्तर पत्रकारिता याःपिं पत्रकारपिनिगु पूर्ण जीवनया बीमाया तयारी सरकारं यानाच्वंगु जानकारी बियदिसें उकिया नितिं बजेटय् अर्थ मन्त्रालयं न्यागू करोड व सञ्चार मन्त्रालयं निगू करोड मुंका कोष निर्माण यायेगु योजना दयेकूगु जानकारी बियादिल । अथेहे पत्रकारिताया विकासया नितिं तालिम व प्रशिक्षणया ब्यवस्था नं मन्त्रालयं यायेत्यंगु जानकारी वय्कलं बियादिल ।
साक्षात्कारय् नेपाली कांग्रेसया नेता डा. मिनेन्द्र रिजालं माओवादी व एमाले नेतृत्वया सरकार ताःमलाये धुंकूगुलिं आः कांग्रेसया नेतृत्वय् सरकार दयेकूसा जक शान्ति व संविधान सम्भव दुगु दाबी यानादिल ।
न्यागू बुादे सहमति कथं याकनं प्रधानमन्त्री झलनाथ खनालं राजीनामा बियाः सहमतिया नितिं मार्ग प्रसस्त यायेमाःगु धयादिसें अस्वीकृत न्ह्यगू बुादे सहमतिपाखें दयेकूगु सरकार दत्तले सहमति जुइमफइगु रिजालया बिचाः खः । न्हापा हे दोहोरो सुरक्षा चीकेगु, ल्याः क्वःछीगु, समायोजनया मापदण्ड, ल्वाभः ब्यवस्थापन लगायतया विषयलय् सहमति जुइधुंकूगुलिं वहे कथं ज्या जुइमाःगु खा जक कांग्रेसं ल्ह्वंगु दाबी यानादिल ।