प्रधानमन्त्रीइ भट्टराईया सिफारिस जुइ : नारायणकाजी
येँ (झीगु स्वनिगः)
आः दयेकीगु सरकारया प्रधानमन्त्रीया नितिं पार्टी न्वकु डा. बाबुराम भट्टराईया सिफारिस बारे माओवादी नेतातय्गु हे मत ल्वाःगु दु । वर्तमान सरकारया राजीनामा न्ह्यः हे प्रधानमन्त्रीया नितिं भट्टराईया नां हुइना भुइना वयेवं माओवादी नेतातय्गु बिचाः ल्वायेत्यंगु खः । पार्टीया मेम्ह न्वकु नारायणकाजी श्रेष्ठ प्रकाशं प्रधानमन्त्रीया नितिं पार्टीयापाखें बाबुराम भट्टराईयात हे सिफारिस याइगु धाःगु छुं घौ हे मबीवं पोलिटव्युरो दुजः अग्नी सापकोटां उकिया बारे छु नं निर्णय मयाःगु धयादीगु खः । आइतवाः सुथय् चितवनया भरतपुर विमानस्थलय् सञ्चारकर्मीतलिसे खाल्हानादिसें न्वकु प्रकाशं भट्टराईयात प्रधानमन्त्रीया नितिं सिफारिस यायेगु बारे पार्टीइ सहलह जूगु जानकारी बियादीगु खःसा न्हिनय् पोलिटव्युरो दुजः सापकोटां उकिया बारे पार्टीइ छु नं आधिकारीक निर्णय मजूगु धयादीगु खः ।
प्रधानमन्त्रीया बारे मेमेगु दलत सहमतिइ वःसा माओवादीं थुकियात याकनं हे क्वःछीगु प्रकाशया धापू खःसा शान्ति व संविधानय् इमान्दार जूसा कांग्रेसया नेतृत्व नं स्वीकार यायेफइगु सापकोटाया धापू खः । नायः प्रचण्डया नेतृत्व यायेगु बिचाः मदुगुलिं न्वकु किरण व भट्टराई मध्य न्ह्याम्ह नं प्रधानमन्त्री जुइफूगु सापकोटाया बिचाः खः ।
