भारतय् सीपिं खाया ला नेपाली बजारय्

कैलाली (झीगु स्वनिगः)

भारतय् हैजां सीपिं खाया ला नेपाली बजारय् खुलेआम बिक्री - वितरण जुयाच्वंगु दु । प्रहरीया संरक्षणय् अज्याःगु ला धनगढी नगरपालिका - १२ जुगेडालिसे स्वानाच्वंगु भारतीय क्षेत्र सुडा व सारियापारपाखें न्हिंन्हिइ धनगढी वयेगु यानाच्वंगु दु । भारतीय क्षेत्रपाखें ख्येा व पंक्षीजन्य वस्तु नेपाः हयेमदइगु कानुनी व्यवस्था दुसां नं भारतीय क्षेत्रपाखें ला बोराय् तयाः धनगढी हयेगु ज्याय् छगू गिरोह हे सक्रिय जुयाच्वंगु दु । प्रहरीं उमिके लच्छियंक धेबा कयाः निर्वाध रुपय् प्रतिबन्धित ला नेपालय् दुतहयेगु यानाच्वंगु स्थानीयं द्वपं ब्यूगु दु । लिपांगु इलय् भारतपाखें खाया ला लिसलिसे म्वाःम्ह खा वयाच्वंगु दु तर नियन्त्रण धाःसा जुइफूगु मदुनि । भारतपाखें हइगु गुणस्तरहीन ला धनगढीया नांजाःगु होटलतय्सं मीगु यानाच्वंगु दु । ला आपूर्तिइ संलग्न व्यक्तिं प्रहरीया संरक्षणय् भारतीय सीमा क्षेत्रपाखें धनगढीतक्क हयेगु यानाच्वंगु धाःगु दु । उपभोक्ताया स्वास्थय् खेलवाड यानाः हैजा थापिं खाया ला नकाः ला व्यवसायीं आपराधिक ज्या याःगु द्वपं उपभोक्तातय्सं ब्यूगु दु ।

ताल्लाया इलय् ध्वग्गिगु ला नकाः महामारी हयेगु ज्या जूगु उमिगु बिचाः खः । जिल्ला पशुस्वास्थ्य ज्याकू, क्वारेनटाइन, धनगढी नगरपालिका व जिल्ला प्रहरी ज्याकूया कमजोर अनुगमनया कारण अवैध ला नेपाः दुहां वयेगु यानाच्वंगु दु । भारतीय सीमाक्षेत्र कमलापुर, बसइ, तिकुनियाा व दोधारा चाादनीपाखें भारतीय खा नेपाः दुहां वयेगु यानाच्वंगुलिं भारतय् खनेदुगु बर्ड फ्लुया संक्रमण नेपालय् न्यनीगु खतरा ब्वलंगु दु । सीमाक्षेत्रय् दुगु सुरक्षा चौकीया लापरबाहीया कारण भारतीय खा नेपाः वयेगु यानाच्वंगु स्थानीय बासिन्दातय्सं धाःगु दु । भारतीय क्षेत्रय् तयार यानाः धनगढी हःगु ला प्रतिकिलो सच्छि व स्वीतका धेबां पसलय् बीगु यानाच्वंगु दुसा पसलं उपभोक्तातय्त निसः व न्यय्तकाया दरं मीगु यानाच्वंगु दु । थुकथं भारतपाखें दंक भावं खाया ला व म्वाःम्ह खा वयेगु यायेवं नेपाली किसान सङ्कटय् लाःगु दु । खा मीगुलिइ कमी वयेवं बैंकपाखें ऋण कयाः कारोबार याःपिं किसानत चिन्तित यानाब्यूगु किसान शङ्करचन्दं धयादिल ।

भारतपाखें वइगु खा पनेगु नितिं जिल्ला प्रशासन लगायतया निकाययात ध्यानाकर्षण याःबलय् नं छु नं सुनुवाइ मजूगु चन्दं नुगः खा तयादिल । राष्ट्रिय उपभोक्ता मञ्च कैलालीया नायः हरि रेग्मीं उपभोक्ताया स्वास्थ्यय् प्रतिकूल असर लाः वनाः गुणस्तरहीन ला मीपिंत कारबाही यायेमाःगु माग नापं याःगु धयादिल । सेती अञ्चल अस्पतालया मेडिकल सुपरिटेन्डेन्ट डा. गणेशबहादुर सिंहं गुणस्तरहीन ला नयेबलय् महामारीया खतरा जुइफूगु धयादिल । पशु क्वारेनटाइनया प्रमुख डा. मीनबहादुर थापां जनशक्तिया अभावय् पिनेपाखें वइगु पशु लिसे पंक्षीजन्य बस्तु पनेमफूगु धयादिल ।

More Stories Like this