लसकुस दक्षिण सुडान - न्हूगु देय्यात

वंगु सञ्चवाः दक्षिण सुडान उत्तर सुडानं व्यागलं च्वनाः न्हूगु स्वतन्त्र देय् कथं विश्वयात म्हसीका वीत ताःलाःगु दु । विश्वयाहे दकले कान्छोगु देय् दक्षिण सुडान ५० औं दँनिसें भोगय् यानावयाच्वंगु शोषण दमनं मुक्त जुयाः न्हूगु देय्या ख्वालं पिलू वःगु दु । विश्व न्यंकया देय्तय्सं नं विना भेदभाव लसकुस याःगु दु । वंगु दँया जनवरीइ दक्षिण सुडानया स्वतन्त्रताया विषयलय् जनमत संग्रह जूगु खः । उगु जनमत संग्रहलय् अप्वः स्यां ब्वतिकयाः याःगु मतदानय् ९९ प्रतिशतं दक्षिण सुडानयात स्वतन्त्र देय् दयेकेगु निर्णय बीवं उकिया खुला लिपा वंगु सञ्चवाः औपचारिक रुपं दक्षिण सुडान स्वतन्त्र जूगु घोषणा यायेवं विश्वया १९३ औ देय्कथं मान्यता व्यूगु खःसा अपि|mकाया ५४ औं देय् जूगु दु । वइगु वालय् दक्षिण सुडानयात स्वतन्त्र देय्या मुलुकया रुपय् राष्ट्र संघं मान्यता वी त्यंगु दु । अनया न्हूम्ह राष्ट्रपति साल्भाकिरं सपथ नयेवंहे थःहे उत्तरी सुडानया राष्ट्रपति अमर अल बाजिरं नापं सुडानया उगु स्वतन्त्र घोषणा सभा ज्याझ्वलय् ब्वतिकायेगु ज्या नाप नापं दकले न्हापां राज्यया मान्यता व्यूगु खः । राष्ट्र संघंया मूछ्याञ्जे वान की मुन, अमेरिकी पूर्व विदेश मन्त्री कोलिन पावेल लगायत विश्वया यक्को राष्ट्र प्रमुख, सरकार प्रमुख व नेतात उगु ज्याझ्वलय् ब्वति कयादीगु खः । सभामुख जेम्स वानी हग्गां सुडानया स्वतन्त्रता बयान ब्वनाः न्यंकेवं उत्तरी सुडानया ध्वांय् लिकयाः दक्षिण सुडानया ध्वांय् तःगु खः ।

वंगु दशकौं अवधीइ दक्षिण व उत्तरया दथ्वी भिषण गृहयुद्ध जूगु खः । उगु गृहयुद्ध लानाः २० औं लाख मनूत सी धुंकूगु दु । वंगु सन् २००५ सं उत्तर व दक्षिणया दथ्वी जूगु सम्झौता कथं वंगु सञ्चवाः उगु कथं न्हूगु देय् कथं मान्यता व्यूगु खः । दक्षिण सुडान न्हूगु देय्कथं छगू स्वतन्त्र देय् जूसां अनया समस्या धाःसा विकराल दु । चिकं छगू जक श्रोत दुगु उगु देय् विश्वया गरीव देय्तय्गु धलखय् तसकं क्वय् लानाच्वंगु दु । करीव ८५ प्रतिशत जनता आःखः हे ब्वनेमसःसा अनया न्हय्म्ह मस्त मध्ये न्यादँ मदयेकंहे छम्ह मचा गरीवी व नये ममखनाः सीगु तथ्यांक दु । थुज्वःगु देशय् छु गुकथं आर्थिक विकासया नितिं श्रोत साधन मानवीय शक्तित जोरय् याइगु खः ? चिउताःया विषय जुयाच्वंगु दु । आर्थिक श्रोतया रुपय् दुगु चिकंया खानीत धाःसा दक्षिणय् लाना च्वंगु दु । तर चिकं निर्यात याइगु पाइपत धाःसा उत्तरी क्षेत्रय् लानाच्वंगु दु । चिकंया आम्दानी वच्छि वच्छि इनाः नयावयाच्वंगु अवस्थायात आः छु गुकथं उकियात व्यवस्था याइगु खः धायेथाकु । उत्तर व दक्षिणया अवस्था स्वयेवलय् निगू देय्या भविष्य उत्तर सम्वन्धीत जुयाच्वंगु दु । छगू देय् निगू जुइधुंकाः उगु सम्वन्धयात छु गुकथं व्यवस्थापन यायेगु धयागुहे मू समस्याया रुपय् न्ह्यःने वःगु दु ।

More Stories Like this