जबजया ब्याख्याया सवालय् विवाद

येँ (झीगु स्वनिगः)

एमालेया मदये धुंकूम्ह तत्कालिन महासचिव मदन भण्डारीं प्रतिपादन यानादीगु जनताया बहुदलीय जनवादयात एमालेया आःयापिं नेतातय्सं ब्यागलं ब्यागलं कथं ब्याख्या यानाहःगुलिं पार्टी दुने समस्या ब्वलना वःगु दु । विशेष यानाः एमालेया संस्थापन पक्ष अर्थात पार्टीया नायः झलनाथ खनाल पक्षधर व माधव नेपाल व केपी ओली पक्षधरं ब्यागलं ब्यागलं कथं ब्याख्या यानाहःगुलिं पार्टी दुने अन्तरविरोध नं तच्वयाः वःगु दु । नेतांनिसें कार्यकर्तातय्सं तकं थःथःगु कथं जबजयात ब्याख्या यानाजूगुलिं एमाले दुने छगू कथं विवाद तकं ब्वलंगु दु । थ्व हे झ्वलय् वर्तमान सरकारया नेतृत्व यानाच्वंगु एमालेया महासचिव ईश्वर पोखरेलं पार्टी दुने जनताया बहुदलीय जनवादया बारे व्यागलं व्यागलं कथंया ब्याख्या जूगुलिं समस्या ब्वलन धकाः धयादीगु दु ।

एमालेया निगू लाइनपाखें नं ब्यागलं च्वनाः थःगु अस्तित्व क्यनाः वयाच्वंम्ह महासचिव वय्कलं धयादिल 'विगतय् पार्टी दुने परिस्थिति कथं जबजया ब्याख्या यानाः सत्ताय् वंगु कारणं हे आः पार्टीं विचारविहीनताया आरोप फये मालाच्वंगु खः' धकाः धयादीगु दु । पार्टीया नेतांनिसें कार्यकर्तातय्सं तकं जबजया बारे न्ह्यःने लाःथे ब्याख्या यानाजूगु दु धयादिसें अथे थःथःगु कथं ब्याख्या मयायेत नेता व कार्यकर्तातय्त इनाप नं यानादिल । एमालेया भ्रातृ संगठन नेपाल टे्रड युनियन महासंघ -जिफन्ट) या राष्ट्रिय महाधिवेशन प्रतिनिधि परिषद्या निक्वःगु बैठकयात म्हिगः येँय् सम्वोधन यायेगु झ्वलय् वय्कलं अथे धयादीगु खः । महासचिव पोखरेलं जबजया बारे नेतांनिसें कार्यकर्तातय्सं तकं थुइकेगुलिइ एकरुपता कथं थुइके मफयाः हे पार्टीं विचारहिनताया द्वपं फये मालाच्वंगु खः धकाः स्पष्ट यानादिल ।
वय्कलं समाजया शान्तिपूर्ण रुपान्तरण हे जबजया आगं खँ खः धयादिसें उकिइ रुपान्तरण धैगु आर्थिक, सामाजिक व राजनीतिक खः धकाः नं दावी यानादिल ।