खनालया सरकार हे ल्यंकातयेगु स्वम्ह नेताया सहमति

येँ (झीगु स्वनिगः)

संविधानसभा नापं व्यवस्थापिका संसदया दक्ले तःधंगु दल एकीकृत नेकपा -माओवादी) नापं संसदय् दुथ्याःगु फुक्क धैथें वाम पार्टीतय्गु समर्थनय् दयेकूगु वर्तमान सरकारया सवालय् पिने थीथी कथं प्रचार प्रसार जुयाच्वंगु इलय् वर्तमान सरकारय् हे दुथ्याःम्ह छम्ह मन्त्रीं धाःसा वर्तमान सरकार महिलेगु धकाः स्वम्ह शीर्ष नेतातय् दथुइ सहमति जुयाच्वंगु दु धकाः खुलासा यानादीगु दु । माओवादीया नायः प्रचण्ड, नेपाली कांग्रेसया सभापति सुशील कोइराला, एमालेया नायः नापं प्रधानमन्त्री झलनाथ खनालया दथुइ आःया सरकारयात ल्यंकाः तयेगु धकाः सहमति जूगु दु धकाः वर्तमान सरकारया मन्त्री भानुभक्त जोशीं खुलासा यानादीगु दु । वनमन्त्री जोशीं ततःधंगु दलया नेतातय्सं पिने न्ह्यागु हे कथं न्वंवानादीगु जूसां बास्तवय् वर्तमान सरकारया विकल्प मालेगु जुइमखु धकाः स्वम्ह हे शीर्ष नेतातय्गु दथुइ सहमति जूगु दु धकाः दावी तकं यानादिल ।

ख्वपय् म्हिगः आइतवाः जूगु नेपाल राष्ट्रिय विद्यार्थी युनियन, नेपाल इन्जिनियर कलेज कमिटीं मनमोहन जयन्तिया लसताय् याःगु बृक्षारोपन ज्याझ्वलय् न्वंवासें वय्कलं उगु कथं खुलासा यानादीगु खः । वनमन्त्री जोशीं धयादिल 'पिने नेतातय्सं न्ह्यागु हे न्वंवाःसां दुने माओवादीया नायः प्रचण्ड, कांग्रेसया सभापति सुशील कोइराला व प्रधानमन्त्री झलनाथ खनालया दथुइ तत्काल सरकार हिलेगुसिबें नं भदौ १४ गतेया दुने न्हूगु संविधानया मस्यौदा व शान्ति प्रकृयाया ज्या यायेगु सहमति जूगु खः ।' स्वंगू दलया दथुइ सहमति कथं संविधानसभाया म्याद स्वला थपे याःगु ई भदौ १४ गतेया दुने नं नेपाःमि जनतायात न्हूगु संविधानया मस्यौदा बिइ मफत धाःसा जनतातय्सं नेतातप्रति विश्वास मयाइगु जुयाः शीर्ष नेतात सरकार विघटन व निर्माणया ज्यासिबें नं संविधान व शान्ति प्रकृया पूवंकेगु नितिं न्ह्याः वनी धकाः मन्त्री जोशीं धयादीगु दु ।