भूमाफियाया चंगुलय् लात

डीआर खड्गी

झी पुर्खा लिच्छवी शासकं निस्वार्थ भावना कठोर परिश्रम यानाः देशयात स्वर्ण युगया अवस्थाय् थ्यंकाः नेपाःया नां विश्वय् कमय् याना वंगु खः। न्हापा न्हापा नेपाःया जनता धाल कि विश्वया जनतां इमान्दारी शान्तिप्रेमी व भलाद्मी धकाः नां कायेगु यानाच्वनी। लिच्छबी शासन पतन जुसांनिसें देशया राजनीतिइ ग्रहण लगे जुइगु सुरु जूगु खः। देशया राजनीति न्ह्याबलें नं निगू पक्ष दयाच्वनी। छगू सकारात्मक व मेगु नकारात्मक शक्तिया दथुइ धेंधेंबल्लाः जुयाच्वनीगु खः। झीगु देशय् स्वदेशी व विदेशी नकारात्मक शक्ति मिले जुयाः सकारात्मक सोच दुपिं देशभक्ततय्त माइनस यायां यंकाच्वंगु दु। थ्वहे कारणं यानाः देश स्यना वनाच्वंगु खः। वास्तवय् देशया राजनीति सकारात्मक सोच दुपिं देशया मूलबासीं यायेमाःगु खः। तर थन विदेशी मूलया नकारात्मक सोच दुपिं व्यक्तितय्सं राजनीति यानाच्वंगुलिं देशया अवस्था खराब जुया वनाच्वंगु खः। विशेष यानाः नेपाःया राजनीतिं खसब्रम्हू व मधेशीतय्गु ल्हातय् लाकाः इपिं नक्कली नेतात जुया सत्ताय् च्वनाच्वंगु दु। इमिगु मूल उद्देश्य खः न्ह्याथेंजाःगु कुकर्म यानाः जूसां ध्यबा कमे यानाः मोजमस्ती यायेगु जक खः। ध्यबा कमे यायेगु लागि हे राजनीति यानाच्वंगुलिं राजनीतिया नामं जनता झंगः लायेगु अनेक नाटक म्हिताच्वंगु खः। थ्व निथ्वः जातिं शान्ति व संविधान निर्माण याये धाधां देशय् अशान्ति, हिंसा व अराजकया स्थितिइ यंकाच्वंगु दु। थ्व निथ्वः जातिं देशया सम्पत्ति जक बर्वाद यानाः मगानाः विदेशी ईशाराय् प्याखं हुलाः देशयात हे तहसनहस यानाः थःगु स्वार्थपूर्ति यानाच्वंगु दु ।

देशया ततःधंगु स्वंगू पार्टी माओवादी, एमाले व कांग्रेसय् लोभी, स्वार्थी, देशप्रति माया मदुपिं खसब्रम्हूतय्सं मुठ्ठीइ तया तःगु दु। स्वार्थी, लोभी नेतात कम्युनिष्ट व कांग्रेसया सिद्धान्तयात जक जनताया न्ह्यःने. बाचन यानाः झंगः लानाः थःपिंत नैतिकहीन ज्या यानाच्वंपिं खः। गुगु गुगु इलय् थःगु ल्हाःतय् सत्ता वइ थ्व जातिं थः लिक्क लाःपिं व कार्यकर्तातय्त प्रशासनया अफिसय् व संस्थानय् भर्ति यानाः भ्रष्टाचार याकाः थःगु स्वार्थ पूरा यानाच्वंगु दु। न्हापां बल्लाक संचालन जुयाच्वंगु समाजवादी देशं बियातःगु उद्योगत ध्वस्त यानाः कवाडी भावं भारतीय मूलया नागरिकतय्त मियाः कमिशन नयेगु ज्या यात। गुगुं इलय् फुक्क उद्योगत ध्वस्त याये सिधल अले हाकनं नेतात व कार्यकर्तात नं मिले जुयाः आम्दानी जुयाच्वंगु संस्थानत गथे कि ट्रलिबस सेवा, साझा यातायात व मेमेगु संस्थानयात नं स्यंकाः ध्वस्त यानाः बिल। थुलि जक मखु फुक्क प्रशासन क्षेत्रयात भ्रष्टाचारया केन्द्रविन्दू याना बिल। गुगुं इलय् निक्वःगु सफल जनआन्दोलन जुल छखे खसब्रम्हू पदय् मेखे मधेशीवादी नेतात नं राजनीतिया नामं देशया उच्च पदय् च्वनाः देशया सम्पत्ति लुटे यायेगुली तच्वयेक न्ह्याः वनेगु शुरु जुल। यक्व आम्दानी जुयाच्वंगु नेपाल आयल नियम, नेशनल ट्रेडिङ्ग, साल्ट ट्रेडिङ्ग, नेपाल डेरी इत्यादीयात नं खराब हालतय् लाका यंकल। थथे संस्थागत धराशाही यायेगु लागि भ्रष्ट व अनैतिक नेतातय्सं थः हनुमानतय्त व्यवस्थापन यायेगुली जिम्मा बिया वंगुलिं खः। झीगु न्ह्यःने न्हाय्कं थें प्रस्ट जुयाच्वंगु दु। नेपाल वायु सेवा नियमयात सुधार यानाः दक्षिण एशियातकं नां कमे यानाः बी धुंकाः प्रतिबद्धता प्वंकूम्ह व्यक्तित्व सुगतरत्नयात अनेक कथंया झंझट जक बियाः मगानाः भ्रष्टाचारया मुद्दाय् तकं फँसे यानाः जेलय् कुनेगु कुतः नं यात ।

माओवादी पार्टीं जनयुद्धया इलय् देशया दुश्मन स्वदेशी सामन्ती व विदेशी पुँजीवादी सामन्ती शक्ति खः धकाः ल्वाभः ल्ह्वनाः युद्ध याःपिं पार्टीत खः। माओवादी पार्टीया देशभक्त लार्डनयात जनतां समर्थन व सहयोग याना वयाच्वंगु नं खः। माओवादी पार्टीं नं घोषणा याःगु खः कि देशया सामन्तीतय्त पराजित याये फःसा विदेशी पुँजीपति सामन्तीतय्सं छ्यं ल्ह्वनेफु धकाः व इलय् विदेशी शक्तिनाप मुकाबिलाया लागि सुरुङ्गतकं निर्माण याःगु खः। गुगु इलय् माओवादी नेतात भारतय् वनाः १२ बुँदा सम्झौता यानाः बहुदलवादी नेतातनाप मिले जुयाः जुजुया शक्तियात माइनस यायेत सफल जुल। माओवादी पार्टीं संविधानसभाया चुनावय् यक्व सिट त्याकाः सत्ताय् वनेत सफल जुल। वहे इलंनिसें नेतातय्सं माओवादीया सिद्धान्तयात ध्याकुनय् वांछ्वयाः विदेशीया ईशाराय् प्याखं हुलेगु कुतः याः थें च्वं। यदि अथे मखुसा माओवादी पार्टीयात विश्वास याकेगु लागि थःगु भागय् लाःगु मन्त्रालय व संस्थानय् ह्वःताः बीमाःगु खः। माओवादी पार्टीं अथे मयाःसे गनं विदेशी मूलया मारवाडीतय्त महत्वपूर्ण नेपाल टेलिकमया व्यवस्थापनया जिम्मा बिल। गनं असक्षम अनुभवहीन व्यक्तितय्त जिम्मा बीगु यानाच्वंगु दु।थज्याःगु गतिविधि यानाच्वंगुलिं माओवादी पार्टीयात देशभक्त कम्युनिष्ट सिद्धान्त त्वःताः वनाच्वंगु दु धकाः अनुमान यायेफु ।

नेपाल वायुसेवा नियमया इतिहासं थ्व नं क्यनाच्वंगु दु। करिब ३३-३४ करोडं सुरु याःगु निगमं दक्षिण एशिया हवाई जहाज कम्पनीतनाप धेंधेंबल्ला यानाः च्वंगु संस्थान खः। झीसं न्यना नेपाल वायुसेवा निगम व थाइल्याण्डया वायुसेवा निगम स्थापना जूगु उलि फरक मदुगु खँ। थौं थाइल्याण्डया वायुसेवा निगमयाके सलंसः जक मखु द्वलंद्वः उडानत विश्वया कुनाकाप्चाय् थ्यनाच्वंगु दु। थाइल्याण्ड वायु सेवा निगमं अकुट सम्पत्ति कमे यायेत सफल जुयाच्वंगु दु। झीगु देशया वायुसेवा निगमया हालत झनझन खराब जुजुं वनाच्वंगु दु ।

नेपाल वायुसेवा निगम स्यना वनाच्वंगुया कारण धइगु छगू ला नेतातय्सं काण्डै काण्ड मचे यानाच्वंगुलिं खःसा मेगु धइगु निगमया व्यवस्थापनय् असक्षम व अनुभवहीन व्यक्तियात जिम्मा बियाः थः लिक्क लाःपिंत नं दुथ्याकाः भ्रष्टाचार याकाच्वंगुलिं खः। वंगु हप्ताय् भूमाफियाया एजेण्ट के.बी. लिम्बु व सक्षम व्यवस्थापक सुगतरत्नयात हटे यानाः असक्षम, अनुभवहीन व्यक्ति मनरुप शाहीयात निगमया व्यवस्थापनया जिम्मा माओवादी मन्त्रीं बीगु यात। असक्षम अनुभवहीन मनरुप शाहीयात व्यवस्थापनया जिम्मा बिउगु उद्देश्य थथे खःथें च्वं। वायुसेवा निगमयात ध्वस्त यानाः हाकनं निजीकरणया नामं तःधंगु कमिशन नयेगु खेल थें च्वं ।

drkhadgi @gmail.com

More Stories Like this