अफ्रिकाय् हानं छगू न्हूगु देय्या जन्म

जनमत संग्रहपाखें सुडान कुचा जुयाः न्हूगु देय् 'दक्षिण सुडान' नांगु न्हूगु देय्या जन्म जूगु दु। म्हिगः उकिया सार्वजनिक घोषणा यासें न्हूगु देय्या न्हूगु संविधान नं जारी यात। थ्व ल्याखं दक्षिण सुडान विश्वया १९३ औं राष्ट्र जूगु दु ।

सुडानय् थ्व न्हूगु देय् घोषणा यायेत जुयाच्वंगु आन्दोलन विश्वया हे दकलय् ताःहाकःगु व ग्यानापुगु गृहयुद्ध मध्ये छगू खः। २० दँ तक जूगु गृहयुद्धय् लखौं मनू सीधुंकूगु दुसा मेपिं लखौं मनू विस्थापित जूगु दु। अन्ततः देय् कुचा यायेगु लाकि छगू हे सुडान जुयाः च्वनेगु धकाः जूगु जनमत संग्रहय् बिस्कं सुडानया पक्षय् ९९ प्रतिशत मत वयाः बिस्कं देय् निर्माणया घोषणा जूगु खः। शान्तिपूर्ण ढंगं न्हूगु देय्या निर्माण जूगु व उकियात सुडानं नं समर्थन याःगु कारणं थ्व घटनायात सकारात्मक रुपं कायेमाःगु खनेदु ।

सुडानय् जूगु थ्व विभाजनयात थीथी कथं विश्लेषण याइपिं देय्फु। नेपाः नं थौं विविध राज्य निर्माण जुइगु संघीय व्यवस्थापाखे न्ह्याः वनाच्वंगु कारणं सुडानया थ्व ऐतिहासिक घटना झीगु लागिं महत्वपूर्ण जुइफु। दक्षिणी जनतां थ्व स्वयां न्ह्यः सुडानयात संघीय प्रणालीइ यंकेमाः धकाः हे आन्दोलन शुरु याःगु खः। तर सुडानया प्रशासनं उकियात वास्ता मयात। देय्या दक्षिणी लागायात स्वायत्तता बीगु मामिलाय् कंजुस्याई याःगु कारणं यानाः हे अन स्वशासनया लागिं जूगु आन्दोलन पृथकतावादी आन्दोलनय् रुपान्तरण जूवंगु खः। सुडान जक मखु थज्याःगु दृष्टान्त विश्वया मेमेगु नं आपालं देशय् दु। थ्व खँ घटना नेपाःया लागिं छगू शिक्षा जुइफु ।

More Stories Like this