सभासद्तय् चर्तिकला

नरेन्द्रमान श्रेष्ठ 'गोंगजु'

'सन्तान थरिथरिका' धाःथें सभासद नं थरिथरिया दइगु जुयाच्वन। खय्त ला थौंया अवस्थाय् ६०१ म्ह सभासद्त नालायक साबित जुइधुंकूगु दु। जनताया लागिं सभासद धइपिं पद, पावर व ध्यबा अले मोज मस्ती याइपिं कुलंगारत हे जुइधुंकूगु दु। गुलिखे सभासद्त कोठीइ वनीपिंनिसें कयाः कुटनीतिक राहदानी मियाः नइपिं तकं दु। गुलिखे सभासद्त सभासद् जुसांनिसें हे विवादय् लानाच्वंगु दुसा गुलिं भ्रष्टबुद्धि, खराब आचरण, अमर्यादित क्रियाकलापं यानाः बदनाम जुयाच्वंगु दु। खय्त ला नेता धाल कि स्वाभाविक रुपं भ्रष्ट व खराब आचरणया जुयाच्वनी। थुकिया झ्वलय् च्वय्या नेतातय्सं सुडानया एपिसी काण्ड याइसा क्वय्या नेतातय्सं राहदानी काण्ड याइ ।

स्वदँया दुने सभासद्तय्सं निम्नस्तरया गुलिखे काण्ड यात व अप्वः धइथें समानुपातिक पाखेया सभासद्तय्सं यानाच्वंगु खनेदु। थीथी राजनीतिक दलतय्सं समानुपातिक हे सभासद नियुक्तिया इलय् राजनीतिक संस्कार, राजनीतिक आचरण, राजनीतिक अनुशासन, चरित्रवान, योग्य, दक्षपिं स्वयां नं राजनैतिक आस्था, पार्टीयात सहयोग याइपिं सभासद्त नियुक्त याःगु खनेदत। खय्त ला पार्टीया शीर्षस्थ नेतात धाःपिं गुलिखे नेतात हे चरित्रवानपिं मखु। संविधानसभायापिं अप्वः धइथें सभासद्तय्सं सभासद पदया महत्व थुइके मफुगु अले सभासद पदयात थःगु व्यक्तिगत स्वार्थया लागि जक छ्यलेगु, अमर्यादित, अनैतिक ज्याय् संलग्न लाइसेन्स जक दयेकाच्वंगु कारणं यानाः थौं नेता व राजनैतिक कार्यकर्तातय् अराजक गतिविधि न्हियान्हिथं अप्वयाच्वंगु दु। भ्रष्टाचारय् संलग्न नेता, पत्रकारयात आक्रमण याइपिं कार्यकर्तात व अमर्यादित क्रियाकलापय् संलग्न सभासद् न्ह्याम्ह हे जूसां राज्यं कारबाही याये मफुगुलिं देशय् भ्रष्टाचार, उदण्डता, अराजकता, अनैतिकता व आपराधिक गतिविधि न्हियान्हिथं अप्वयाच्वंगु खः। सभासद् थेंजाःगु मर्यादित पदय् थ्यनेधुंकाः छु याये जिउ, छु याये मजिउ अले छु यायेमाः, छु यायेम्वाः धकाः विचाः यानाः ज्या यायेगु स्वयां नं गथे यानाः ध्यबा कमे यायेगु, मोजमस्ती यायेगु अले सभासद् पदयात अवसर कथं छ्यलेगु धकाः सभासद्त लगे जुयाच्वंगु खने दयाच्वन। संविधानसभाय् जाति, लिङ्ग, क्षेत्रया आधारय् समावेशी प्रतिनिधित्व यानाच्वंपिं अप्वः सभासद्त अमर्यादित, आपराधिक गतिविधिइ संलग्न जूगु खनेदु। विकसित देशय् उच्चशिक्षा कयाः, विद्वान जुयाः योग्य, दक्ष जुइधुंकाः हे जक सभासद्, मन्त्री, प्रधानमन्त्री जुइ तर नेपालय् सभासद् जुइगु लागिं अज्याःगु छुं हे मापदण्ड पूरा यायेम्वाः। शिक्षाया खँ ल्हायेगु खःसा छम्ह सभासदं थःगु पलेसा थः म्ह्याय्यात एसएलसी जाँच बीके छ्वःगु घटना तकं थन जूगु खः। अवसर मदयाः अध्ययन मयाइगु थःगु थासय् दु। दुगु अवसरयात नं उकथं दुरुपयोग यायेगु सभासद् धाःपिंत ल्वःगु खँ मखु। एसएलसी तकं कर्पिंत बीके छ्वइपिं सभासद्तय्सं देय्या गम्भीर समस्यात गय् यानाः समाधान याइ, थ्व शंकाया हे विषय तिनि। न्हूगु गणतान्त्रिक संविधान च्वयेगु जिम्मेवारी ज्वनाः संविधानसभाय् वःपिं गुलिखे सभासद्तय्सं थःगु पदीय मर्यादाया अःखः भ्रष्ट आचरण क्यनाः स्वदँया दुने कुटनीतिक राहदानी दुरुपयोग, घुस काण्ड, यौन काण्ड, जू काण्ड, चोरी काण्ड, वनविनाश, हातहतियार काण्डत याःगु खनेदत ।

संविधानसभाया चुनाव लिपा माननीय जुइत ह्वःताः चूलाःपिं गुलिखे सभासद्त सुरुंनिसें हे अनैतिक, अमर्यादित ज्याय् लगे जूगु खनेदु। सभासद् जुयाः संविधान च्वयाः देय्या ऐन कानून पालना याकेत जनतायात ग्वाहालि याये माःपिं सभासद्त थः हे खुलेआम अनैतिक ज्याय् लगे जुल। कोठी वनीम्ह नेपाली कांग्रेसया सभासद् कृष्णप्रसाद पाण्डे, गबलें ल्वाभः, गबलें यौन काण्डं विवादय् लानाच्वनीम्ह सभासद खोभारी राय यादव, सिडियोयात न्यतालय् दाइम्ह फोरम लोकतान्त्रिकया सभासद् करिमा बेगम, संसद्या बैठकय् मवँसे जू म्हिताच्वनीम्ह नेपाली कांग्रेसया सभासद अच्युतराज पाण्डे, सिँया तस्करी यानाः प्रहरीया हिरासतय् लाःम्ह माओवादीया सभासद् चन्दा देवी थेंजाःपिं सभासद्तय्सं नेपाःयात बदनाम यानाच्वंगु दु। अय्नं थज्याःपिं सभासद्तय्त न राज्यं कारबाही याः, न राजनीतिक दलतय्सं ।

नेपालय् छगू धापू दु 'च्यागू क्लासय् फेल जुल धाःसा कि नेता जुइ कि अभिनेता जुइ।' सिनेमाया हिरोइनतय्सं बाखंया माग धकाः अंग प्रदर्शन याइ, राजनीतिया नेतातय्सं पार्टीया आवश्यकता धकाः गुण्डात लहिना जुइ। नेपालय् कलाकार जुइत जक मखु राजनीति यायेत तकं योग्यता म्वाः धइगु खँ राजनैतिक दलतय्सं यानाच्वंगु क्रियाकलापं स्पष्ट जू। उकिं ला खुया हःगु गाडी गया जुइम्ह सभासद खड्गप्रसाद विश्वकर्मा पर्यटन मन्त्री जुइ, मानव अधिकार हनन याःम्ह सभासद् अग्नीप्रसाद सापकोटा सूचना मन्त्री जुइ। स्वंगू स्वंगू देय्या नागरिकता कयातःम्ह सभासद् ल्हारक्याल लामा अर्थ राज्यमन्त्री जुइ। थःगु कुटनीतिक राहदानी मिया नःपिं सभासद्त सावित्री साह व वीपी यादवपिं थःगु हे पार्टी दुने सम्मानित जुइ।नेपालगञ्जया सतकय् अय्लाः त्वनाः तमाशा क्यनीम्ह सभासद् शारदा नेपालीयात प्रहरीं सलाम याइ ।

खय्त ला राज्यया धुकू स्वाहा यानाः सदनय् थ्यंपिं ६०१ म्ह सभासदतय् अप्वः ज्या सदनय् शीर्ष नेतातय्सं छु धाल वहे यायेगु, कोरम मगाःसा ब्वाँय् वनाः सीट जायेका बीगु जक खः। थःगु राय बीगु, विवेक छ्यलेगु ज्या न उमिसं गबलें याःगु दु, न उमित गबलें याके बियातःगु दु ।

More Stories Like this