कांग्रेसं माओवादी दुने म्हितल
येँ (सन्ध्या टाइम्स)/एकीकृत माओवादीं न्हापा न्हापा कांग्रेस व एमाले लगायतया दल दुने म्हिताः अन्तर्विरोध चर्के याइ थें आः थ्वहे पार्टीया नेतातय्सं माओवादी दुनेया अन्तर्विरोधय् म्हिताः लबः कायेगु सुरु याना हःगु दु ।
एकीकृत माओवादीं पार्टी अध्यक्ष प्रचण्डयात हे प्रधानमन्त्री दयेकेगु धकाः न्हापा धयाच्वंगु इलय् कांग्रेस नेतातय्सं प्रचण्ड मखु उपाध्यक्ष डा. बाबुराम भट्टराईयात प्रधानमन्त्री दयेकल धाःसा उकियात थःपिंसं नं स्वीकार याये धया हःगु खः। उकियात हे ध्यानय् तयाः माओवादीं नं डा. बाबुराम भट्टराईयात हे प्रधानमन्त्री दयेकेगु धकाः माहौल तयार याना हःगु खः। अध्यक्ष प्रचण्ड पुचः उकिया लागिं तयार नं जुइधुंकूगु दु। तर थज्याःगु अवस्थाय् थ्यनेधुंकाः आः वयाः कांग्रेसं हानं बाबुराम मखु प्रचण्ड हे प्रधानमन्त्री जूसा जक थःपिंसं स्वीकार याये फइ धकाः न्हूगु हे खँ न्ह्यःने हःगु दु। कांग्रेसं याना हःगु थ्व न्हूगु धापूयात वास्तवय् माओवादी दुने म्हिताः उमिगु अन्तर्विरोध चर्के यायेगु कुतः जक खः धकाः टिप्पणी यानाहःगु दु। माओवादी नेतृत्वय् सरकार दयेकल धाःसा दकलय् अप्वः थःपिंत ज्या मछिंगु अवस्था वइ धकाः माओवादीयात सरकारय् छ्वये मजिउ बरु एमालें सरकार दयेकल धाःसा थःपिंत नितिं बांलाइ धइगु तायेकाः कांग्रेस नेतातय्सं थज्याःगु भूमिका म्हिताच्वंगु खः धयाहःगु दु ।
सरकारया नेतृत्वया सवालय् 'आलोपालो' याना वनेगु धकाः न्हापा यानातःगु सहमति पालना याना वनेगु झ्वलय् थःपिनि पार्टी दुने नं प्रधानमन्त्रीया सवालय् विवाद ब्वलनीगु सम्भावना अप्वया वःगुलिं कांग्रेसया नेतातय्सं बरु झलनाथ खनाल हे प्रधानमन्त्री जुयाच्वन धाःसा बांलाइ धइगु तायेकाः थज्याःगु भूमिका म्हिताहःगु टिप्पणी मनूतय्सं यानाहःगु खः। कांग्रेसय् नं शेरबहादुर देउवा पक्षधरं संसदीय दलया नेता हिलेमाः धकाः अभियान हे न्ह्याकाच्वंगु दु ।
