मचिकं व डिजेलया भाः नं थकाल
येँ (सन्ध्या टाइम्स)/नेपाल आयल निगमं थनिंनिसें हे लागू जुइकथं मचिकं व डिजेलया भाः नं थकाःगु दु। वंगु चान्हय् च्वंगु निगम संचालक समितिया बैठकं थनिंनिसें हे लागू यायेगु कथं मचिकं व डिजेलया भाः थकायेगु निर्णय याःगु खः ।
आयल निगमं डिजेल व मचिकनय् प्रतिलिटरय् ५/५ तका भाः थकायेगु निर्णय याःगु खः। नेपाल आयल निगमया प्रवक्ता मुकुन्द ढुंगेलं भाः थकायेगु निर्णय जूगु सार्वजनिक जानकारी बियादीगु दु। भाः थकाःगु जूसां निगमं डिजेलय् प्रतिलिटर ९ रुपैंया १६ पैसा घाटा बेहोरे यायेमाः धाःसा मचिकनय् १६ पैसा नाफा जुइ धाःगु दु। अथे भाः थकायेधुंकाः निगमं मासिक ७४ करोडय् कुहां वइ धकाः संचारकर्मीतय्त ढुंगेलं जानकारी बियादीगु दु। वय्कलं धयादी कथं आः भाः थकाये न्ह्यः मासिक १ अर्ब ४ करोड तका घाटा बेहोरे याना वयाच्वंगु खः। छुं दिं न्ह्यः जक पेट्रोलय् निगमं भाः थकाःगु खः ।
अन्तर्राष्ट्रिय बजारय् पेट्रोलियम पदार्थया भाः लगातार थहां वनाच्वंगु दु। भारतय् वंगु जुन २५ तारिकय् पेट्रोलियम पदार्थया भाः थकाःगु खः ।
