जागरण मञ्चया अधिवेशन भाद्रय्
येँ (सन्ध्या टाइम्स)/ नेवाः जागरण मञ्चया न्हापांगु अधिवेशन वइगु भाद्र ३ गते येँय् याइगु जूगु दु। म्हिगः यलय् च्वंगु मञ्चया तदर्थ समितिया मुँज्यां उगु निर्णय याःगु खः। थ्वयां न्ह्यः वंगु जेष्ठ १४ लिपाया राजनीतिक स्थिति स्वयाः जक अधिवेशन यायेगु निर्णय याःगु खः ।
अथे हे म्हिगःया मुँज्यां आः वइगु शनिवाः कुन्हु अधिवेशन तयारी समिति नीस्वनेगु नितिं क्रियाशील सदस्यतय्गु छगू मुँज्या च्वनेत्यंगु दुसा श्रावण ७ गते साधारण सदस्य लःल्हायेगु व श्रावण २१ गते साधारण सदस्यतय्गु नं छगू बृहत भेला यायेगु निर्णय याःगु दु ।
अथेहे येँ महानगरपालिकायात येँ देय् व येँ दुनेया शहर विकास निर्माणया ज्याय् स्थानीय सहभागिता याका यंकेगु नितिं विशेष पहल यायेत दबाव बीगु निर्णय नं याःगु दु।
येँ दुनेया शहरकथं वडा नं. १७ निसें ३० तकया १४ गू वडाया विकास निर्माण बांलाक मजुयाच्वंगुलिं नेवाःतय्गु मौलिक परम्परा, पहिचान दुगु थुगु लागाया बहाः, बही, चुकनिसें पुलांगु बजाः व लँ, धः निर्माण, ट्राफिक व्यवस्थापनया लिसें सकतां ज्या यायेगु नितिं येँ महानगरपालिका दुने शहर विकास समिति हे स्वनाः ज्या यायेमाःगु आवश्यक्ता नं महसुस याःगु दु। थ्व विषययात कयाः याकनं हे १७ निसें ३० वडा दुनेया संघसंस्थातय्गु भेला सःतेगु निर्णय नं याःगु दु ।
