फिल्मया नक्कल यानाः प्यतँजालं तिन्हूम्ह मचा घाःपाः

येँ (सन्ध्या टाइम्स)/'सपुत' नांगु नेपाली फिल्म स्वयाः छेँय् लिहां वःम्ह छम्ह मचां वहे फिल्मया नक्कल यासें थःगु हे छेँया प्यतँजालं तिन्हुया वःगु दु। तिन्हयाः घाःपाः जूम्ह मचायात आः अस्पताल भर्ना याःगु दु। नेपालगञ्ज बसपार्कय् च्वंम्ह १२ दँया रविनाथ योगी प्यतँजालं तिंन्हुया वःगु खःसा आः वयागु देपागु तुति त्वःधूगु दु। नेपालगञ्जया छगू हलय् म्हिगः फिल्म स्वयाः लिहां वःम्ह रविनाथं बहनी फिल्मया नायक 'अभय चन्द'या नक्कल यानाः तिंन्हुयावःगु खः। ४ कक्षाय् ब्वनीम्ह वयात आः स्थानीय बैभव मेडिकलय् वासः यानाच्वंगु दु ।