नेपालभाषाया न्हूगु संकिपा 'थः कतः कतः थः'

समाजय् व्याप्त जुयाच्वंगु हिंसा मध्ये मिजं हिंसायात मू विषयबस्तु कःघाना दयेकूगु नेपालभाषाया न्हूगु छगू संकिपा 'थः कतः कतः थः' आः याकनं हे स्वयेदइगु जूगु दु । महालक्ष्मी मुभी म्याक्स प्रा.लि.या लुखां भाजु विनोद ताम्राकारं निर्माण यानादीगु थुगु संकिपा भाजु पि.के.श्रेष्ठं च्वयादीगु खःसा भाजु जितेन्द्र राजोपाध्यायं निर्देशन यानादीगु खः ।

थःगु देसय् लजगाः मदया कमेयायेत विदेश वनीम्ह छम्ह मिजं थःम्हेसिनं फुथें मफुथें कमेयाना छ्वयाहःगु धेवाः थःहे कलाःम्हेसिनं दुरुपयोग यानातःगुलिं लिपा थःगु छेँय् वःबलय् बिचल्ली जुइमाःगु व मेम्ह हे मिसालिसे इहिपा यायेत नं कानूनि पंगः दुगुलिं अथे नं याये मफुगु मार्मिक बाखँ न्ह्यब्वयातःगु थुगु संकिपा थ्वहे श्रावणया निगूगु वाः पाखें स्वकुमितय् दथुइ न्ह्यब्वयेगु कुतःजुयाच्वंगु च्वमि भाजु पि. के. श्रेष्ठं नेपालमण्डल डटकमयात जानकारी बियादिल ।

'नेपालभाषा, जाति, कला, संस्कृति प्रेमीपिंत समर्पित नेवाः राज्यया निंतिं नेवाः नुगः ब्वलंके' धइगु नारा ज्वना दयेकूगु थुगु संकिपाय् भाजु सविन शाक्य व मय्जु सविना डंगोलया मू भूमिका लिसें सुरेन्द्र केसी, अन्नपूर्णेश्वरी श्रेष्ठ, शुशिल राजोपाध्याय, सुरेन्द्र महर्जन व रुपेन्द्र श्रेष्ठ नापं ३२म्ह कलाकारत दुथ्यानाच्वंगु दु ।

करीव ९ लाख तकाया बजेटय् दयेकूगु थुगु संकिपा देशब्यापि भ्रमण याना नेवाः दक्वसित क्यनेगु आज्जु तयागु च्वमि भाजु श्रेष्ठं कनादिल । संकिपाय् ३ पु म्येँ दुथ्याकातःगु दुसा भाजु अनिश शाक्यं म्येँ च्वयादीगु खः । लय् विजय कायस्थं तयादीगु खःसा भाजु जुजु वज्राचार्य, भाजु सविन श्रेष्ठ, मय्जु निशा देसार व मय्जु स्वस्ति महर्जनपिंसं म्येँय् सः बियात:गु दु ।

More Stories Like this