फेशन

मञ्जु मास्के
माघ महिना । चिकुसे च्वं । थ्व महिनाय् भ्वय्या साइत नं यक्व दइगु । भ्वय् वँवं हे लिमलाः । भ्वय्या ब्बनापौ नं गुलि जक वइगु न्हापा जूसा स्याःन्याःपिं थःथिति,मिले जूपिं पासापिं व फुकीतय्सं बाहेक मेपिन्सं भ्वय् सःतिगु चलन हे मदु । भ्वय् छकः वनेत हे आय्बू । आः ला तापाःपिं थःथितिपिं सःते हे म्वाःपिन्सं नं भ्वय्या ब्बनापौ छ्वयाहइगु । ब्बनापौ जक जम्मा यानाः तःसाला चाङ्कका चाङ्क दये धुंकल जुइ । छु जक जमाना वये धुंकल धयागु नि । भ्वय् नं गुलिफत उलि सःतेफत धायेवं हे बराय् चाये थें का । भ्वय् नं भ्वय् ला न्ह्याग्गु छगू जूसां भ्वय् । मचा पास जूसां भ्वय्,बुदिं जूसां भ्वय्,बार्‍हाः पिकाःसां भ्वय् । व नं थौंकन्हय् सितिकं नयेज्यूगु मखये धुंकल ।

भ्वय् वँवं हे वाक्कइक्क हे वये धुंकल । भ्वय् नं छथाय् जक ला छन्हु हे निथाय् स्वथाय् पाःलाइगु । गन निं वनेगु । छथाय् वंसा मेथाय् मवः धकाः तंचाइ । व जक ला क्वसः हे तयेमाला च्वनीगु । मवंसें गा हे मगात,मवंसा क्वसः बीमाःला भ्वय् मवल धायेत नं छु बेर । भ्वय् वनेथाय् नं सतीसां छगू हे का । आगरा,डिगरा पाइगु,गबलें यलय् सा गबलें ख्वपय् । जिमि पासा तिमिलाचां धाःगु "इपिं ला छन्हुया निथाय् स्वथाय् लातकि छथाय् तुच्चा जक यायेगु,मेथाय् भ्वय् नयेगु हं ।"इमि धकाः मोटर दु,र्सरर मोटरय् च्वनाः निथाय् जक छु प्यथाय् नं वनेफु । थःपिनि जुलं मोटर दुगु मखु । ट्याक्सि गयाः वनेमाः । ट्याक्सि गयाः गन जक नि वनेगु ? ट्याक्सि ड्राइभरत नं गुलि माते जू । भचा तापाःथाय् धेबा अप्वः ब्यूसां हे ह्याः धाइतिनि का ।

भ्वय् नं छु नयेगु । न्ह्याथाय् वंसां वहे पार्टिभ्वय् । न्हापा जूसा सुकूभ्वय् जुइ । तःखाः,सन्याखुना गुलि साः,आः हे ह्मुतुइ सवाः वः । आःला न्ह्याथाय् वंसां व हे परिकार जक पुलाउ,अचार,ला,तरकारी आदि । चिल्लोया चिल्लो जक । भ्वय् छकः वना वल धायेवं हे प्वाः जक थिक मजुइगु । उखुन्हु का जिमि म्ह्याय्चिया भाःतपिंथाय् भ्वय् वना वइगु ला चिल्लोया चिल्लो जूगुलिं ला वायु थहांवयाः वाक्की वाक्की जक वयाः छुत्तिका । जिमि मिजंया ला प्वाः स्याकाः गय् च्वं का ।

भ्वय् छकः वनेत नं वसः तिसा मिलेयायां थिक । भ्वय् वनेखुन्हु जुल धायेवं ला झन जक लिमलाः । म्वःल्हुइ हे माल,ल्हातय् पालिस छकःसां तयेमाल । भ्वय् छकः वनेत नं तन्ता हे । मिजंतय् हे याउँसे च्वं । छुं याना नं च्वनेम्वाः । न्ह्याथाय् वंसां व हे लं पुनावंसां ज्न्यू । भ्वय् जक वनाः गाःला मिस्तय् निन्द्रा चर्चा हे अप्वः जुइगु । जिमि तताःजुपिं नाप भ्वय् वनेबलय् ला इमि मिखा हे खालि तिसा वसतय् जक जुइगु । भ्वय् वनाः छेँय् थ्यने मलाःनि । जिमि तताःजुं न्यने हे धुंकी "छिं खं ला फलानाया हेराया सिखःमाः । गय्च्वं ? हेरा हे गपाय् गपाय् ग्वः !मेह्म तताःजुं हानं धाइ ? "फलानाया पर्सि हे गय् च्वं । गुलि थिके जुइ हः ला ? जितः धाःसा अज्याःगु छुं हे मतलब मदु । गबलें गबलें आः ला जि नं भ्वय् वनेबलय् सुया सुया छु छु तिसा,वसः पुनावल स्वये धकाः मतिइ तय् । भ्वय् वनाः छेँय् थ्यन धायेवं तिनि लुमंसे वइगु का । जि ला धाथें ध्वां हे का धकाः मतिइ वइ । हानं अय्क मति वइ न्ह्याह्मेस्यां न्ह्यागु तिया वा,पुना वा छु मतलब ।

जि ला तसकं हे चिकु चाः । छेँय् च्वनेबलय् स्वयेटर फिनाः नं गाभलं भ्वसुक न्ययेमाःम्ह । उकिं चिकुलां भ्वय् धयागु हे वने मास्तिमवः । उखुन्हु जिमि चिरिमांया थाय् भ्वय् वनागु । अन ला भ्वय् वःपिं सुनानं गां न्यना तक हे मवः । जि ला धाथें बुरि हे पहः वयाः मछाःसे च्वनावल । स्वेटर फिना तइगुलिं ला झन ल्हाःतकं हे लिकाये मछाल । धाथें थौंकन्हय्यापिं मिस्तय्सं चिकु नं मचाः ला थें हला ? जिमि पासा मिनाचा जि थें भचा चिकुचाःह्मेसिके जिं न्यना । मिनाचां धाल "थौंकन्हय्यापिं मिस्त तिसावसः ब्बयेमाःगुलिं चिकुसां सह याइ का । धाथें झीथाय् च्वंपिं मिस्तय् फेशन धैगु जक यायेदःसा । चिकुलां छु फी माः । तांन्वःबलय् छु फीमाः धैगु हे मदु । ई अनुसार धकाः वसः फीमाः । फिल्म स्वल,टिभि सिरियल स्वल । व हे नक्कल यात । बांलाःगु भिंगु छता धकाः नक्कल यायेसःगु मखु । यूरोपय् च्वंपिं मनूतय् जुलं खंला,इमि ई अनुसार वसः पुनाजुइ । चिकुलां जूसा कोट,वभर कोट फिना जुइ । जिमि भाःतया ला चिकुलां भ्वय् झायाः लिहां झाल धायेवं हे मुरमुरे जुयादी "झीथाय् च्वंपिं मिस्तय्सं गबलय् छु वसः पुनेमाः धैगु मस्यूपिं । फेशन जक यायेदःसा गाः । वसः
फिनावःगु खँखं हे तं वः गांमाः धयापिं ।" ख नं खः धया वसः पुने जक दःसा गाः । थःत ल्वयेके माः धैगु नं मदु । जिमि ताःबतया काय्या बिहाः भ्वजय् का नकतिनियापिं नच्चापिं मिसा मस्तय्सं लं फिनावःगु खँखं हे जिगु नुगःद्यः हे थुरुथुरु खातका । व नं शुद्ध चिकुलाया जःखः । लं नं लं ला लिउने नं खुल्ला, न्ह्यःने नं खुल्ला । फ्याःकापः मदुगु फ्याः थें । उलि जक ला मेह्म मिसामचाया ला झन च्वय् कय्ता बालाति हे मदु,म्वःल्हुइबलय् प्याकसा हिने थें ह्वाङ्क का । भ्वय् वःपिं सकस्यां मिखा व हे नच्चापिं मिस्तय्थाय् जक । ...... अहो, धन्य धन्य थौंकन्हय्या फेशनयात ।

More Stories Like this