अन्तरदेशीय साहित्यकारपिन्त च्वसापासापाखें लसकुस

नेपाल प्रज्ञा प्रतिष्ठानया ब्वनाय् अन्तरदेशीय साहित्य सम्मेलनय् ब्वति काःझायादीपिं जःलाखःला देय् भारतया थी थी राज्यया साहित्यकारपिन्त थौं येँय् च्वसापासां लसकुस व नापलायेगु ज्याझ्वः यात ।

ज्याझ्वलय् च्वसापासाया पुलांम्ह नायः व नेपालभाषा एकेदमिया चान्सलर संस्कृतविद् सत्यमोहन जोशीं नेपालभाषा व साहित्यया बारे दुग्यंक न्ववानादीगु खः ।

अथेहे च्वसापासाया नायः पद्मरत्न तुलाधरं पासादेशय् च्वंच्वनादीपिं च्वमि साहित्यकारपिन्त लसकुस यायेदुगुली लसता प्वंकादिसें थजाःगु ज्याझ्वलं निगू देय्या स्वापू तक क्वातुकीगु बिचाः प्वंकादिल ।

सिक्किमया हर्क थाम्दा, बंगालया प्रा.डा. सुबोधकुमार जोष्ट, बनारसया दुर्गाप्रसाद श्रेष्ठ, गान्तोकया डा. राजेन्द्र भण्डारी, आसामया भवानी प्रसाद शर्मा, दार्जिलिङया मनप्रसाद शुक्ला आदि अन्तरदेशीय साहित्यकारपिन्सं चिनाखँ नापं थःथःगु नुगः खँ प्वंकादीगु खः ।

ज्याझ्वलय् नेपालभाषाया च्वमि साहित्यकार लक्ष्मण राजवंशी, पूर्ण बैद्य, प्रतिसरा साय्मि, तिलक प्रकाश कायस्थ, ध्रुव मधिकःमि, शशिकला मानन्धर, राजा शाक्य, बुद्ध साय्मि, प्राज्ञ सुलोचना मानन्धर, प्रा. नर्मदेश्वर प्रधान, रीना तुलाधर आदि ब्यक्तिपिनिगु उपस्थिति दुगु खः ।

More Stories Like this