किपुली नेपाः पार्टीपाखें हुटिङ
किपू(सन्ध्या टाइम्स)/नेपाः राष्ट्रिय पार्टीपाखें थःपिंत नं दुथ्याकाः जक किपू नगरपालिकाया परिषद् संचालन यायेमाः धकाः माग यासें थौं नपाया नगरपरिषद् जुयाच्वंगु इलय् हे माग याःगु दु। माग यानाः ज्ञापन पौ तकं लःल्हाःगु खःसा नेपाः पार्टीया मागयात बेवास्ता याःगुलिं उगु पार्टीया नेता व कार्यकर्तातय्सं छुं ई हुटिङ समेत याःगु खः। लिपा किपूया प्यंगू दलया संयन्त्रया बैठक च्वनाः जक नेपाः राष्ट्रिय पार्टीया सवालय् निर्णय यायेगु जुइ धासें परिषद्या उद्घाटन समारोह क्वचायेकूगु खः। उगु उलज्याय् समारोहय् स्थानीय विकासमन्त्री उर्मिला अर्यालयात मूपाहां दयेकातःगु खःसां वय्कः उपस्थित मजूगुलिं किपू लागाया सांसद् माओवादीया नेता दिलीप महर्जन मूपाहां जुयादीगु खः। किपुली नगरपालिकाया संयन्त्रय् एकीकृत माओवादी, कांग्रेस, एमाले व नेमकिपा जक दुथ्यानाच्वंगु दु ।
