मनपाय् नेवाःतय्त २५ प्रतिशत बजेट माग

येँ (सन्ध्या टाइम्स)/एकीकृत नेवाः राष्ट्रिय मुक्ति मोर्चा येँ जिल्लाया ग्वसालय् म्हिगः येँ मनपाया आर्थिक वर्ष २०६८/०६९ या न्हूगु बजेट नापं नीति तथा कार्यक्रम विषयय् जूगु अन्तर्क्रियाय् मनपाया न्हूगु बजेटय् नेवाःतय्गु नितिं २५ प्रतिशत दां फ्यायेमाःगु माग जूगु दु।
मोर्चा येँ जिल्लाया नायः पञ्चलाल महर्जनं न्हूगु बजेटयात कयाः न्ह्यब्वयादीगु ३१ बुँदाया प्रस्तावय् उगु माग यानातःगु खः। ज्याझ्वलय् ब्वति काःपिं नेवाः न्ह्यलुवातय्सं नं उकियात समर्थन यासें नेवाः स्वायत्त राज्य मंकाः संघर्ष समिति व येँ मनपा दथुइ जूगु ७ बुँदाया सहमति मध्ये छगू हे बुँदा आः तक कार्यान्वयन मयाःगुलिं आपत्ति प्वंकाः कार्यान्वयन यायेत माग याःगु खः ।

ज्याझ्वलय् मोर्चाया मूछ्यांज्ये पवनमान श्रेष्ठ, विशिष्ट पाहां न्वकुपिं सभासद् हिसिला यमि व दिलिप महर्जन, मनपाया सहायक कार्यकारी अधिकृत सुमन दाहाल, नेवाः स्वायत्त राज्य मंकाः संघर्ष समितिया नरेश ताम्राकार, सुजिव बज्राचार्य, मिसा न्ह्यलुवा डा. चुन्दा बज्राचार्य, येँ मनपा नेवाः ज्याकःमि गुथिया नायः नरेन्द्रराज श्रेष्ठ नापं मेमेपिं कर्मचारीतय्सं नं न्ववानादीगु खः। ज्याझ्वलय् मनपाय् नेवाः कार्यकारी अधिकृत हयेत भूमिका म्हितेत नं बः बिउगु खः ।

महानगर घोषणा
कंस आइतवाः 'येँ महानगर २०६८ घोषणा' यायेत थनिंनिसें मनपां गोष्ठी न्ह्याकूगु दु। गोदावरीइ जुयाच्वंगु गोष्ठीइ महानगरया थीथी ज्यानाप स्वापू दुपिं १५ म्ह विज्ञतय्सं ज्यापौ न्ह्यब्वयादी। स्थानीय विकास मन्त्री उर्मिला अर्यालं उलेज्या यानादीगु उगु ज्याझ्वः लिपा वइगु आइतवाः छगू समारोह यासें प्रधानमन्त्रीपाखें महानगर घोषणा जुइ ।