हानं लुँवहः लुया वल
येँ(सन्ध्या टाइम्स)/हनुमानध्वाखाय् जीर्णोद्धारया झ्वलय् लुया वःगु थीथी बाकस मध्ये ल्यं दुगु निगः बाकस थौं थीथी मनूतय् रोहवरय् चायेकूगु दु। उकी मध्ये तग्वःगु बाकसय् छुं हे लुया मवःसा चिग्वःगुली धाःसा न्हापा थें हे आपालं लुँ व वहःया ज्वलं तयातःगु लूगु दु।
चिग्वःगु बाकसय् लुँ स्वयां वहःया ज्वलं यक्व लूगु दु। उकी लुँयागु ज्वलनय् मुकुट च्यागू, सिखः निपु, तिलहरी निपु, लँयागु हे तार निपु लुया वःगु दु।
अथे हे वहःया ज्वलनय् तपाःगु पुजाभः स्वपाः, चिपाःगु न्यापाः, तग्वःगु गिलास निगः, पंचपात्र निगः, जलथल छगः, अर्घ छगू, म्वाहालि बाजं स्वंगू, ख्वला प्यंगः, खण्ड खण्ड यानातःगु छुं भचा, पाल्चा छप्वाः नं लुया वःगु दु।
थ्व लुँ व वहःया ज्वलंया परिमाण गुलि दु धइगु खँ धाःसा सी मदुनि। थौं न्हिनय् १ बजे थ्व झ्वः च्वयाच्वनागु इलय् तक अन बाकस चायेकेगु ज्या क्वचायेधुंकूगु दुसा लुया वःगु ज्वलं लनेगु तयारी जुयाच्वंगु दु।
