रक्सौलय् नेपाः विरुद्ध नाराबाजी

येँ(सन्ध्या टाइम्स)/चर्चित प्रहरी एसपी रमेश खरेलयात पर्सा सरुवा यायेवं वय्कलं सुरु यानादीगु वीरगंज भन्सारया कडा चेक जाँचं कायल जूपिं भारतीय ड्राइभरतय्सं नेपाः विरुद्ध नाराबाजी याःगु दु। थौं सुथंनिसें भारतीय गाडी ड्राइभरतय्सं वीरगंज-रक्सौल स्वाइगु मितेरी ताँय् च्वनाः नेपाः विरुद्ध नाराबाजी याःगु खः।
ताँय् हे च्वनाः नाराबाजी याःगुलिं उगु नाका जुयाः नेपाः-भारत वये वने जुइगु लँ नं बन्द जूगु दु। वये वने यायेमाःगु गाडी नं फुक्कं अन हे जाम जूगु दुसा रक्सौलया बजाः वनेमाःपिं नेपाःमित नं अन हे थानाच्वंगु दु। नेपाःपाखें उखे वनीगु रिक्सा समेत पना बिउगु कारणं निगुलिं देय्या नागरिकत पैदल हे सीमा पार यायेत बाध्य जुयाच्वंगु दु।
पर्सा जिल्लाय् न्हूम्ह प्रहरी एसपी वनेवं भारतं अवैध रुपं दुहां वइगु सामान पनेगु व घूस नइपिं प्रहरीतय्त नं कारवाही यायेगु सुरु जूगु खः। नेपाःया गाडी नापं आः भारतीय गाडीयात समेत कडा रुपं चेक जाँच यानाः उमिसं ज्वना वःगु अवैध सामान जफत यायेवं तम्वःपिं ड्राइभरतय्सं ताँय् हे च्वनाः नाराबाजी याःगु खः। उमिसं नेपाली नम्बरप्लेटया गाडीयात दुमकासे पनातःगु दुसा भारतीय गाडीयात धाःसा मपं।