सरकारी गाडी ज्वनाः क्याबिनय् वःम्ह ज्वन
येँ(सन्ध्या टाइम्स)/अफिसया ज्या सिधयेकाः अफिसया हे गाडी ज्वनाः क्याबिन रेष्टुरेन्टय् रसरंग यानाच्वंम्ह नेपाल टेलिकमया छम्ह कर्मचारीयात इटहरीया स्थानीय ल्याय्म्हतय् ग्वाहालिइ ज्वंगु दु।
नेपाल टेलिकम विराटनगरया छम्ह अधिकारीयात गाडी सहित पकली राजमार्गय् लाःगु छगू रेष्टुरेन्टय् आपत्तिजनक अवस्थाय् खनेवं सुनसरीया प्रजिअयात खबर यानाः वयात ज्वंके बिउगु खः। बा. १ ञ १४९८ नम्बरया ज्याकूया हे गाडी ज्वनाः मोजमस्ती याः वःम्ह उम्ह अधिकारी व वया ड्राइभर निम्हेसितं ज्वंगु खँ प्रहरीं धाःगु दु।
वयात कारवाही यानाच्वंगु हे इलय् सरकारी गाडी ज्वनाः क्याबिन रेष्टुरेन्टय् वःम्ह मेम्ह छम्ह कर्मचारी धाःसा दथुं तुं बिसिउँ वंगु खँ धाःगु दु। सरकारी धुकू दुरुपयोग यानाः क्याबिन रेष्टुरेन्टय् वःम्ह उम्ह कर्मचारीयात कडा कारवाही जुइगु खँ धाःगु दु।
थौंकन्हय् इटहरीइ छुं स्थानीय ल्याय्म्हत जानाः सरकारी गाडी दुरुपयोगयात पनेगु लागिं न्हूगु कथंया अभियान हे न्ह्याकाः सक्रिय जुयाच्वंगु दु।
