शिकार जुयाच्वंगु दु…

नर्मदेश्वर प्रधान

रत्नपार्क । माइक्रो बस । च्वने । न्ह्याकी । ब्वाकी । तसकं ब्वाकी । दुने च्वंिपं इई पनी । नागबिलि कयाः न्ह्याइ । नामुद फुटबल कासामि पेलें छले यायां वँवं फुटबल न्ह्याकी थें । माइक्रो बस गबलें जवय् । गबलें खवय् । लेन हिहिउँ मेमेगु बहानयात ओभरटेक याना वनी । चालकया ख्वालय् करामतया लु खनेदइ । जितः चिन्ता जुइ । पीर जुइ । गनं थ्व माइक्रो बस न्याकीगु खः ला स्वइतं क्ययेका वनीगु खः ला । छुं न छुं दुर्घटना जुइ । पक्का । ड्राइभर थःगु सुरय् माइक्रो बस ब्वाकाच्वनी । मतिइ लुइ । माइक्रो बसय् च्वनीपिं म्हुतु दुगु ला मदु ला । उकथं ग्यानापुक्क ब्वाकलं नं सुनां नं न्ववाःगु मखु । फुक्क सुम्क । फुकस्यां ख्वालय् भय् दु । मोटर असामान्य गितं न्ह्याः वनाच्वंगु दु । सकस्यां चाः । तर सुयां वक् फुटे मजू । करिपंत छु धाये । जि थः हे नं मूक । मोटर ब्वाका- च्वंम्हेसित स्वये । अनसं दिकाः दाये ला । खँ हे जक । छुं याये फुगु मखु । मनय् त्रास । मोटर रफ्तारं ब्वाकाच्वनी । अय्लाखं कयाः पलाः थातय् मलाःम्ह मनू थें । माइक्रो बसया गति थासय् मलाः ।

छु यानाः ब्वाकागु मोटर चले याये नं मसः ला छम्ह मय्जु हाला हइ । बल्ल जिगु नुगः याउँइ । जिं धायेमाःगु खँ सुनां नं धयाबिउ थें । जिगु नुगः हलुका जुइ । लिफः स्वये । न्ववाःम्ह मय्जु नीदँ ति जक दुम्ह जुयाच्वन । शायद कथुं पिकाये मफुगु जक खयेमाः । बस दुने च्वंपिं सकलें ड्राइभर खनाः चिन्तित खनेदु । अथे हे खः । नुगलय् खँ दयां जक मजिउ । खँ तछ्यानाः धाये फयेकेत आँट माः । लिउने झी सः तसः जुइ । क्वथाय् झी क्रान्तिकारी जुइ । न्ववायेमाःथाय् छुं धाये फइ मखु । लाटा जुइ । वाक्कु छिनाः सह यायेगु थःगु महानता तायेकी ।

खुल्ला थासय् छाय् मब्वाकी… माइक्रो बसय् च्वंम्ह खलासी हाला हइ । छाय् ब्वाकागु धाःम्ह मय्जुयात वं हाथ्या बी । नागःतुगः याना हइ । चालकया ग्वाहालि काइ । मिसा मचायात कयाः टिकाटिप्पणी याना हइ । मिसा मचां खःगु धाःगु खः । लाःलाःथे मोटर न्ह्याकायन । छु न छुं जुइ ला अनसं । यक्व सम्भावना दु । मय्जुं पाय्छि धाःगु खः । सुनां न्ववाये मफु । मय्जुं धया बिल । तर धयां छु याये । मय्जुया खँ न्यनाः माइक्रो बसया गतिइ छुं संयम खने मदु । मिखा तिसिनाः ब्वाकाच्वंगु दु । अःखः मय्जुयात कयाः खलासीं ब्यङ्ग नकी । मजाक याइ । बसयात म्हो गितं यंकी । मय्जुं धाःगु खँ उमित ब्वः बिउगु खः । अपमान जुइ । खलासीं न्ववानाच्वंगु अपशब्द जिं ताः । बस दुने सकस्यां ताः जुइ । तर …। । मय्जुं नं लिपा छुं मधाः । न्ववायेथाय् मखु । अःखः न्ववाःम्हेसित हे चिच्चाः वइ । मनय् जितः नं गाक्कं तं वइ । तर छु याये थःगु तं थःत हे । छुं धाये फुगु मखु । जिं मतिइ तये । थौं झी निरिह नागरिक । छगू बस स्टप वइ । न्हाचः न्ववाःम्ह मय्जु कुहां वनी । कुहां वंम्ह मय्जुयात खलासी व चालक निम्हं जानाः खिसि याइ । ह्वारह्वार न्हिलाः टिका टिप्पणी याइ । ब्वाके मते धाःम्ह मय्जु मानौ छम्ह चरित्र मदुम्ह मिसायात थें वयात उमिसं उपहास याइ । वाकुछिनाः सह याये ।

म्ह्याय्नं बरोबर खलासीं याइगु दुव्र्यवहारयात कयाः खँ ल्हानाच्वनी । जिमिसं धाये हालेमते । बसय् वादविवाद यानच्वने मते । थौकन्हय् ग्यानापु । खःगु खँ धयां छु याये । स्वयातं न्ववाये जिउगु मखु । खँ मामुली जुयाच्वनी । इखय् मनूतय्सं ज्यान नं कया बी । थौंकन्हय् स्यायेगु पालेगु छुं नं मखय् धुंकल । हानं सुनां नं स्यायेत स्वःसां बचे सुनां नं याइ मखु । मखुगु ई वयेधुंकल । मस्तय्त बीगु मन्त्र थौकन्हय् थ्वहे जुइ । खःगु खँय् ल्वायेमाः धायेफुगु ई मखय्धुंकल ।

माइक्रो बसं थौंकन्हय् चालक व खलासीतय्त मचायेक शोषण यानाच्वंगु दु । माइक्रो बसया थुवाः साहुत जुइ । आर्जन जूगु ध्यबा साहुतय् जुइ । तलब छुं भति चालक व खलासीयात बी । माइक्रो बसं अप्वः आम्दानी यात धाःसा खलासी व ड्राइभरं मोज याये दइ मखु । थ्व वास्तविकता खः । मोटरथुवाःतसेँ यात्रु शोषण यायेत खलासी व ड्राइभर छ्यली । साहुत पर्दां किकाच्वनी । जनतायात खलासी ड्राइभरत लिसे ल्वाकी । पूच्वं रत्नपार्क तकया भाडा १० तका खः । आधिकारिक भाः । तर व्यवहारय् खलासीतय्सं ११ तका कायेत स्वइ । १० तका बिल कि ल्वायेत स्वइ । दुव्र्यवहार याइ । बामलाःगु म्हुतु छय्ली । खँ छतकाया मखु । सरकार यातायात संघया सम्झौतां छगू भाः क्वःछी । कायेबलय् मेगु जुइ । थ्व छु थ्व देशय् सरकार मदुला थनया जनता लाश ला थुमित न्ह्याथे याःसां जिउ ला उपभोक्ता संघ गन वन बस माइक्रो बस जनतां गइ । सर्वसाधारण जनताया थ्व प्रतिक जुइ । नियमत दयेकी । दयेकातःगु नियमयात कार्यान्वयन मयासे खलासी व जनता ल्वाकी । सरकार मुकदर्शक जुइ । साहुत पोसे याइ । जनतायात दमन शोषण यायेगु जाबा माइक्रो बसयात निश्चित भाडा क्वःछी मफुसा कार्यान्वयन याये मफुसा देशय् व सरकारं छु यानाः नये फइ दुःखपूर्ण न्ह्यसः जुइ ।

खलासीं अप्वः ध्यबाया नितिं यात्रुतनाप हाली ल्वाइ । तर सुया नितिं मात्र साहुया नितिं । जनतायात भार बियाः साहु पोसे यायेगु ज्याभः खलासी व ड्राइभर जुयाबी । खलासी व ड्राइभरं थ्व खँ चाइ मखु । साहुतय्सं उमित अन्धकारय् लाकी ।

ट्राफिक सप्ताहया खँ वइ । मन्त्रीं लँय् वयाः ट्राफिक नियमया पर्चा इनी । थ्व गाइजात्रा मखु
ला ओभरटेक याये मजिउ । तीव्रगितं मोटर न्ह्याके मजिउ । माइक्रो बसय् क्तल तयाः ट्राफिक सप्ताह भव्यरुपं न्यायेकी । तर अनसं मोटरतसें मिखा तिसिनाः ओभरटेक यानाच्वनी । अनियन्त्रित गतिं मोटर ब्वाकी । ट्राफिक पुलिसतय्त छुं मतलव दुगु मखु । तमासा स्वयाच्वनी । लाइसेन्स चेक यायेगु । मौकाय् ध्यबा नयेगु । ट्राफिकया ज्या थुलिं अप्वः छु देश स्वय्म थौं अय्लाखं काःगु माइक्रो बस थें बेढंगं न्ह्यानाच्वंगु दु । झी जनता यात्रु । देशया ड्राइभर खलासीतय् शिकार जुयाच्वंगु दु ।

More Stories Like this