सिक्किमया भ्रमण टोलियात नेवाः देय् दबुलिइ लसकुस
सिक्किम नेवाः गुथि, मालि डाँडाया न्वकू भाजु जंग बहादुर प्रधानया नेतृत्वय् नेपाः भ्रमणय् झायाच्वंगु प्रतिनिधिमण्डलं नेवाः राष्ट्रिय संगठन नेवाः देय् दबूया ज्याकुथि जूगु लसकुस ज्याझ्वलय् ब्वति कयादिल । नेवाः देय् दबूया नायः भाजु नरेश ताम्रकारं लसकुस यानादिसें सिमा दुने व पिने धैगु सिमा बन्धन मतःसे हलिमय् न्ह्याथाय् च्वंसां झी सकल नेवाः, नेवाः हे खः, झीके दुगु हिया नाता दु उकियात देय्या सिमां पनीमखु धयादिल । सिक्किमया नेवाःतय्के वःगु साँस्कृतिक पुनर्जागरण नेपाःया नेवाःतय्त नं छगू अनुकरणीय उदाहरण जुयाच्वंगु खँ न्ह्यथनादिल । लसकुसया झ्वलय् देय् दबूया संरक्षक भाजु लक्ष्मण राजबंशीजुं सिक्किमया मुख्य मन्त्री भाजु पवन चामलिङ्गं नेवाः भाय् व संस्कृतियात पुनर्जागरण हयेत यानादीगु योगदानया कदर यासें नेवाः देय् दबूलिं सकल नेवाःतय्गु पाखें अभिनन्दन यानागु खँ लुमंकादिल ।
भ्रमण टोलीया नेता सिक्किम नेवाः गुथि मलि डाँडाया न्वकू भाजु जंग बहादुर प्रधानजुं नेपाःया नेवाःतय्गु सदां हे उत्तिहे माया मतिना व सदभाव दयाहेच्वनी धइगु आशा व भलसा प्वंकादिल । मय्जुपिंसं अष्टमात्रिका प्याखँ सयेकाच्वंगु खँ न्ह्यथनादिल । ज्याझ्वलय् न्वकू धर्मशोभा तुलाधर, मूदुजः माइला बाबु द्योला, येँ जिल्ला नायः न्हुछेकाजी महर्जन, छ्यांजे मचाराजा महर्जन, विद्यार्थी दबूया नायः रिशा श्रेष्ठ, मूछ्यांजे छवि श्रेष्ठ लगायतपिं उपस्थित दुगु खः ।
News Location:
More Stories Like this
कन्याम इलामय् नेपालभाषा कक्षा न्ह्यात धिमे बाजं व भाषा प्रशिक्षण ज्याझ्वः क्वचाल थुर्पुय् स्वक्वःगु लाखे प्याखँ धेधेबल्ला ओखलढुंगाय् नेपालभाषा कक्षा क्वचाल नेवाः देय् दबू ओखलढुंगा तदर्थ समिति स्वन
