सिक्किमय् जुइगु नेवाः महोत्सवया लागिं थिमिइ तयारी
स्वन्ति न्ह्यः अन जुइगु उगु महोत्सवय् नेवाः नसा त्वँसा ब्वज्या, नेवाः सांस्कृतिक झाँकी, नेवाः बाजं आदिया ब्वज्या जुइ
थिमि(सन्ध्या टाइम्स)/सिक्किम नेवाः गुथिया ग्वसालय् थ्वहे वइगु अक्टोबर महिनाय् सिक्किमय् न्हापांखुसी जुइगु तःजिगु नेवाः महोत्सवया लागिं सिक्किमया कलाकारतय् छगू पुचः थौंकन्हय् स्वनिगःया थिमिइ वयाः अभ्यास यानाच्वंगु दु।
सिक्किम नेवाः गुथि मलिडाँडाया झिंनिम्ह स्थानीय कलाकारतय् पुचः गुथिया न्वकु जंगबहादुर प्रधानया नेतृत्वय् येँय् वयाच्वंगु खः। उमित थिमिइ गुरुपिं सुरेन्द्र विक्रम प्रजापति नापं थीथी प्रशिक्षकतय्सं हुलाप्याखं स्यनाच्वंगु दु। थन च्यान्हु झिन्हु च्वनाः चर्या, आधुनिक व ज्यापु प्याखं सयेकाः लिहां वनेगु व सिक्किमय् उमिसं हानं मेपिंत वहे प्याखं स्यनीगु ग्वसाः दु।
मध्यपुर कला परिषदं संयोजन याइगु उगु नेवाः महोत्सवय् न्ह्यब्वइगु सांस्कृतिक ब्वज्याया तयारी यायेत उपिं थन वयाच्वंगु खः। मोहनि क्वचायेकाः स्वन्ति न्ह्यः अन जुइगु उगु महोत्सवय् नेवाः नसा त्वँसा ब्वज्या, नेवाः सांस्कृतिक झाँकी, नेवाः बाजं आदिया ब्वज्या जुइगु खँ मध्यपुर कला परिषदया गुरु गणेशराम लाछिं सन्ध्या टाइम्सयात कनादिल।
सिक्किम राज्य सरकारं अन च्वंपिं नेवाः लगायत थीथी जनजातिया स्थानयि भाषा, संस्कृति च्वन्ह्याकेगु लागिं राज्यस्तरं हे बजेट बीगु व्यवस्था यानातःगु दु।
News Location:
