सहिद दशरथ चन्दया सछि व च्यादँ बुन्हि न्यायेकल
यल(सन्ध्या टाइम्स)/वि.सं. १९९७ सालया सहिद दशरथ चन्दया सच्छि व च्यादँ बुदिं शुक्रवाः यलय् छगू ज्याझ्वःया दथुइ न्यायेकल। पूच्वय् च्वंगु वय्कःया झ्वाताय् स्वांमाः क्वखायेकाः उगु बुन्हि हंगु खः। शहीद स्मारक समिति केन्द्रीय कार्यालयया ग्वसालय् जूगु उगु ज्याझ्वलय् 'राष्ट्रिय सवाल' विषयय् अन्तर्क्रिया ज्याझ्वः नं जूगु खः। शहीद स्मारक समितिया अध्यक्ष प्रकाशधर शर्माया सभापतित्वय् जूगु ज्याझ्वलय् मूपाहां डा. सुन्दरकृष्ण जोशीं सहिदपिंत सम्मान व आदर यायेमाःगु खँय् बः बियादिल ।
छगू मिनेट मौन धारण यासें न्ह्याकूगु ज्याझ्वलय् हस्तकला संघया पुलांम्ह अध्यक्ष इन्द्रबहादुर शाक्यं तत्कालिन इतिहास कुलादीगु खः। ज्याझ्वलय् जनसरोकार सञ्जाल नेपालया कोषाध्यक्ष डा. यादवप्रसाद ढुंगाना, राष्ट्रिय एकता पार्टीया सहअध्यक्ष भरत जंगम, अधिवक्ता पुण्यप्रसाद अर्याल, भोलानाथ उपाध्याय लगायतया वक्तातय्सं न्ववानादीगु खः ।
