मजदुरपाखें आयल निगम घेराउ
येँ (सन्ध्या टाइम्स)/पेट्रोलियम डिलर्स एसोशियसनपाखें थःपिंलिसे जूगु सहमति कार्यान्वयन मयाः धासें पेट्रोल पम्पतय् ज्या याइपिं मजदुर व कर्मचारीतय्सं थौं सुथय् नेपाल आयल निगमया ज्याकू घेरे यात ।
पेट्रोल पम्पय् ज्या याइपिं मजदुरतय्त नियुक्तिपत्र बीमाःगु, हालया तलब व सुविधा अप्वयेकेमाःगु नापं पोशाकया व्यवस्था व कल्याणकारी कोष स्थापना यायेगु धइगु द्विपक्षीय सहमतियात व्यवसायीतय्सं पालना मयाः धासें मजदूरतय्सं थौं निगमया ज्याकू घेराउ याःगु खः। अखिल नेपाल पेट्रोलियम मजदुर संघया केन्द्रीय दुजः नवराज भट्टं कनादी कथं थौं सुथय् ११ निसें १२ बजे तक निगम घेराउ यायेगु ज्या जूगु खः। न्याला न्ह्यः जूगु लिखित सहमतियात कार्यान्वयन याकेत बाध्य जुयाः थःपिं आन्दोलनय् कुहां वयेमाःगु खँ वय्कलं कनादीगु दु ।
थौंकन्हय् पेट्रोल ल्ह्यइगु ट्यांकरतय् आन्दोलन यानाः पेट्रोलियम पदार्थया हाहाकार जुयाच्वंगु इलय् लाक्क हे मजदुरपाखें नं थज्याःगु ख्याच्वः वःगु खः ।
