'स्थानीय चुनाव सम्भव मदु'

येँ (सन्ध्या टाइम्स)/स्थानीय निकाय संचालनया लागिं दयेकेगु धकाः सरकारं न्ह्यःने हःगु सर्वदलीय परिषद् गठनया प्रस्तावयात स्थगित यायेधुंकाः आः स्थानीय निकाय गय् यानाः संचालन यायेगु धकाः सरकारयात हानं समस्या वःगु दु ।

आः स्थानीय निकायया चुनाव हे यायेमाः धकाः चीधंगु १७ गू दलतय्सं माग यानाच्वंगु दुसां स्थानीय विकास मन्त्री उर्मिला अर्यालं धाःसा आः थथें स्थानीय निकायया चुनाव यायेगु सम्भव मदु धयादीगु दु। थौं सुथय् संचारकर्मी लिसे खँ ल्हासें मन्त्रीं अर्यालं देशय् राजनीतिक संकट ब्वलनाच्वंगु कारणं आः थथें चुनाव यायेगु अवस्था मदु धयादीगु खः ।

देशय् राजनीतिक संकटया नापं थीथी कथंया समस्यात न्ह्यःने दुगुलिं न्हूगु जनादेशय् वनेगु वातावरण मदुगु खँ नं वय्कलं स्पष्ट यानादिल। देय्या वर्तमान अवस्था गथे च्वं धइगु सीक सीक नं चुनावया खँ ल्हायेगु धाथेंया दुर्भाग्यपूर्ण खँ खः धासें वय्कलं यदि फुक्कं दलतय्सं चुनावय् हे वनेगु धकाः लिखित सहमति जने यात धाःसा चुनावय् वनेत नं थःपिं तयार दुगु खँ वय्कलं कनादिल। तर दलतय् दथुइ अज्याःगु सहमति जुइगु सम्भावना धाःसा मदुगु खँ नं वय्कलं स्पष्ट यानादिल ।

स्थानीय निकायया लागिं सरकारं दँय् ४४ अर्ब तकाया बजेट फ्यानाच्वंगु दु। तर निर्वाचित पदाधिकारी मदुगुलिं उकियात बांलाक उपयोग याये खनाच्वंगु मदुगुलिं न्हूगु संरचना आवश्यक जूगु खः धइगु वय्कयाः दावी खः।
सरकारं स्थानीय निकाय संचालनया लागिं संविधानसभाया चुनावय् ३ प्रतिशत तक मत हःगु पार्टीयात दुथ्याकाः परिषद् गठन यायेगु धकाः हःगु प्रस्तावयात चीधंगु दलतय्सं विरोध यानाः सदन तकं चले याके बी मखु धायेवं म्हिगः सरकारं आःयात थ्व योजना स्थगित यायेगु जुल धकाः घोषणा याःगु खः ।