थुगुसी नं मिसा हे अप्वइगु सम्भावना
येँ (सन्ध्या टाइम्स)/थुगुसी काये सिधःगु जनगणनाय् नं मिजं स्वयां मिस्तय् ल्याः हे अप्वः खने दइगु जूगु दु। आः नकतिनि क्वचाःगु जनगणनाया झ्वलय् थीथी थासय् जूगु सर्वेक्षणया झ्वलय् थ्व सम्भावना खने दया वःगु खः।तथ्यांक विभागया तथ्यांकविद् ज्ञानेन्द्र वज्राचार्यं कनादी कथं नेपाःया आपालं मिजंत वैदेशिक रोजगारीया झ्वलय् विदेश वनाच्वंगुलिं थुगुसी नं मिजं स्वयां मिस्तय् ल्याः हे अप्वः दइगु सम्भावना खनेदुगु खः। आपालं मिजंत वैदेशिक रोजगारीया झ्वलय् विदेश वनाच्वंगुलिं गुलिखे गामय् मिसाया मिस्त जक च्वनाच्वंगु नं लूगु दु। गुलिं गामय् मिजंत दुसां मस्त व बुराबुरि जक दुगु नं लूगु खः ।
थनिं झिदँ न्ह्यः काःगु जनगणनाय् नेपाःया कुल जनसंख्या २ करोड ३१ लाख ५१ हजार ४२३ दुगुली मिजं स्वयां मिस्तय् ल्याः १७,५८१ म्ह अप्वः दुगु खः। आः नं थ्व अनुपात मिसाया हे पक्षय् वनाः मिजंतय् ल्याः म्हो खने दइगु सम्भावना दुगु खँ भाजु वज्राचार्यं कनादिल। क्वचाःगु जनगणनाया झ्वलय् आः देय्न्यंकंया फाराम येँय् दुकायेगु ज्या जुयाच्वंगु दु। असार महिना जःछि हे फाराम दुकायेगु ज्या जुइसा वयां लिपा इन्ट्रीया ज्या शुरु जुइ। असोजया अन्तिम वालय् न्हापांगु तथ्यांक पिहां वइगु अनुमान दु ।
