पेट्रोल पनीपिंत गोलीं कयेके फइगु कानून
येँ (सन्ध्या टाइम्स)/पेट्रोल ढुवानी व्यवसायीतय्सं न्ह्याबलें न्ह्याबलें थें पंगः थनाः स्वनिगः नापं देय्न्यंकं पेट्रोलियम पदार्थया समस्या ब्वलंकेगु ज्या यानाच्वंगुलिं वाणिज्य तथा आपूर्ति मन्त्रालयपाखें गृह मन्त्रालययात छगू पौ छ्वयाः अत्यावश्यक सेवा ऐन लागू यायेत इनाप याःगु दु ।
वाणिज्य तथा आपूर्ति मन्त्रालयया सह सचिव गणेश ढकालं धयादिल, 'आः गृह मन्त्रालयपाखें निर्णय यायेवं हे उगु ऐन लागू जुइ।' थुगु ऐन कथं सुनानं पेट्रोल ढुवानीइ पंगः थन धाःसा वयात गोलीं तक कयेके फइगु व्यवस्था दु। वय्कलं धयादिल 'आः गृह मन्त्रालयपाखें सूचना पिकयाः ऐन कथं कारवाही यायेवं उगु प्रक्रिया न्ह्याकी, थुकिं यानाः यःयःथे हडताल यायेगु ज्यायात पनी ।'
पेट्रोलियम पदार्थ ढुवानी जक जुल धाःसा आपूर्तिइ छुं नं कथंया समस्या जुइ मखु धयादिसें ढकालं पेट्रोल दु तर वितरण यायेत ट्याङ्कर तयार मदु धयादिल। पेट्रोलियम पदार्थ ढुवानी याइपिं व्यवसायीतय्सं आन्दोलन याना वयाच्वंगुलिं स्वनिगः नापं देय्न्यंकं हे पेट्रोलियम पदार्थ मदयाः जनजीवनय् तकं लिच्वः लानाच्वंगु दु ।
