बालकुमारी पुजाया स्वर्ण महोत्सव

येँ(सन्ध्या टाइम्स)/श्री बालकुमारी पूजा कमिटीया ग्वसालय् वंगु शनिवाः असंया बाल कुमारी त्वालय् श्री बालकुमारी पुजाया झ्वलय् ३६५ म्ह कन्या पालं व ५० दँ स्वर्ण महोत्सव झःझः धायेक हन। दँय्दसं असार शुक्ल पक्षया भिंगु तिथिइ लाकाः थुगु पूजा यानाच्वं कथं थुगुसी पारु कुन्हु पुजा याःगु खः। सुथय् श्री बाल कुमारीद्यःया तान्त्रिक विधिकथं पूजा यानाःलि श्री कुमारी, गणेश, कुमार व भैरवयात थाकुलि, न्वकुलि, स्वकुलि व प्यकुलि यानाः स्वसः व खुइन्याम्ह कन्या मस्तय्त पुजा याःगु खः।
परम्परांनिसें न्ह्याना वयाच्वंगु थ्व पुजा दथुइ छक्वः ताः ई हे त्वाःदःगु खःसां वि.सं. २०१८ सालंनिसें झिंन्हय्म्ह दुजः दुगु 'श्री बालकुमारी पूजा कमिटी' नामं पुचः हे स्वनाः हानं पुजायात निरन्तरता बिया वयाच्वनागु खँ कमिटीया नायः नापं गुथिया थाकुलि गणेश बहादुर प्रधानांगं कनादिल। अथे हे संल्हू पतिकं लय्पुजा नं निरन्तर कथं याना वयाच्वनागु खँ वय्कलं कनादिल। स्वर्ण महोत्सवया लसताय् कमिटीपाखें १० ग्रामया स्वसः व खुइगुंगः वहःया पाँय्म्वः नं पुजाय् ब्वति काः वःपिं सकलें मस्तय्त ल:ल्हाःगु खः। पुजाय् श्रद्धालु भक्तजनपिंसं नं इच्छाकथं नसाज्वलं व थीथी ज्वलं लःल्हाःगु खः।
थुगु पुजाया प्रभावं देशय् अतिवृष्टि अनावृष्टि मजुइगु, महामारी मन्यनीगु व मस्तय्त छुं नं कथंया ल्वचं मकइगु जनविश्वास दु।