लुँ बुदिंया झ्वलय् विराटया बिचाः मुँज्या

थिमि (सन्ध्या टाइम्स)/विराट नेपालभाषा साहित्य सम्मेलन गुथिया लुँ बुदिंया लसताय् थिमिया शंखधर पार्टी पालेसय् 'विराट नेपालभाषा साहित्य सम्मेलन: म्हिगः, थौं व कन्हय्' विषयय् बिचाः मुँज्या जुल। विराट गुथिया संस्थापक दुजः रत्नगोपाल साय्जुं मुँज्याया उलेज्या यानादिल। ज्याझ्वलय् वय्कलं न्यय्दँ न्ह्यः ख्वपया स्वीनिगू संस्था जानाः साहित्यिक रुपं राजनीतिक संघर्ष न्ह्यज्याकेगु हे ताः तयाः मंकाः विराट गुथि नामं उगु संस्था नीस्वंगु खँ कनादिल। ज्याझ्वलय् विराट गुथिया अध्यक्ष त्रिरत्न शाक्यं गुथिया ज्यापौ न्ह्यब्वयादिसें थःपिनि प्यक्वःगु विराट सम्मेलनंनिसें हे राजनीतिक रुपं न्ह्याः वनेगु नारा तय जुइधुंकूगु खँ कनादिल ।

ज्यापौयात कयाः टिप्पणी यायेगु झ्वलय् विराट गुथिया पुलांम्ह नायः प्रा. गोविन्दमान श्रेष्ठं विराट गुथिया उपस्थिति नेपाः राष्ट्रयात हे प्रेरणादायिक उपलब्धी जूगु टिप्पणी यानादिल। मेम्ह टिप्पणीकार डा. पुष्पराज राजकर्णिकारं विराटया सैद्धान्तिक रुपान्तरण यायेगु खँ मिले मजूगु बुझाव बियादिल। टिप्पणी यायेगु हे झ्वलय् डा. चुन्दा बज्राचार्यं छुं नं कथं राज्यया आर्थिक अनुदान मदयेकं विराट थेंज्याःगु जनस्तरया नेपालभाषा संस्था चले जुयाच्वंगु विश्वय् हे नमूना जुइफु धयादिल ।

विराटया नायः त्रिरत्न शाक्यया सभापतित्वय् जूगु उगु बिचाः मुँज्याय् नेपालभाषा मंकाः खलःया नायः किरण शाक्य, नेपा: राष्ट्रिय पार्टीया अध्यक्ष डा. केशवमान शाक्य, विराट गुथिया पुलांम्ह नायः नरेन्द्रभक्त हाडा व विराट गुथिया सल्लाहकार कवि पूर्णबहादुर वैद्यपिंसं भाषा, साहित्य व संस्कृतिया लागाय् ज्वः मदुगु नेवाः संस्था विराट गुथियात राष्ट्रब्यापी रुपं सांस्कृतिक अभियान न्ह्याकीगु संस्था कथं विकास याना वनेमाःगु सुझाव बियादिल। ज्याझ्वलय् कृष्णबहादुर घजु, श्यामकृष्ण कोजू व जुलुमलाल चित्रकारपिंसं ज्यापौयात कयाः थीथी सुझाब बियादीगु खःसा ध्रुव मधिकर्मि व नारद बज्राचार्यपिंसं नं लिखित सुझाव बियादीगु खः ।