जीरो फिगर दयेकीपिं मिस्त टीबीया शिकार

ख्वप/जमाना फेशनया। बांलाकेगु लागिं मनूत न्ह्यागु यायेत नं तयार दु। थ्व झ्वलय् गंसि खने दयेकेत थःगु म्हयात 'जीरो फिगर'य् रुपान्तरण याइपिं मिस्त नं ग्वाःग्वाः हे खने दया वःगु दु। तर न हे मनसे जीरो फिगर दयेकीपिं मिस्तय् स्वास्थ्य गुलि स्यनाच्वंगु दु धइगु खँ धाःसा फिजिकल फिटनेसपाखे मखु थिमिया क्षयरोग अस्पतालय् स्वः वन धाःसा बांलाक हे सी दइ।
शरीर बांलाकेत जीरो फिगर दयेकेगु झ्वलय् गंल्वय् (टीबी-क्षयरोग)या शिकार जूपिं नच्चानच्चापिं आपालं मिस्त थौंकन्हय् थिमिया राष्ट्रिय क्षयरोग केन्द्रय् वासः याकेत वयाच्वंगु खँ अस्पताल सूत्रं धाःगु दु। नकतिनि झिंच्यादँ निसें नीदँ तिनि दुपिं टेन प्लस टु ब्वनाच्वंपिं आपालं मिसा मस्त टीबीया शिकार जुयाः प्रत्येक्ष निगरानिइ नियमित वासः नयेगु कार्यक्रम 'डट्स'य् वये मालाच्वंगु दु।
नेपाल क्षयरोग निवारण संस्थाया केन्द्रीय दुजः महेन्द्रगोपाल कर्माचार्यं कनादी कथं जीरो फिगर दयेकेत नयेगु कम याना जुइपिं अज्याःपिं मिसा मस्तय्त तच्वःगु ढंगया गंल्वय् 'एमडीआर टीबी' समेत जुयाच्वंगु लूगु दु। थज्याःगु टीबी जुल धाःसा २७ महिना तक छन्हु हे त्वःमफिकुसे वासः नयेमाः।
जीरो फिगर दयेकेगु झ्वलय् गंल्वचं कःपिं नच्चापिं मिसा मस्त स्वनिगः जक मखु देय्न्यंकंया हे थीथी शहरं वयेगु यानाच्वंगु दु। उमित थिमिया केन्द्रीय अस्पतालं जाँचे यानाः लिपा प्रत्यक्ष निगरानीइ तयाः वासः नकेगु कार्यक्रम 'डट्स' य् सहभागी याना छ्वइ। उकथं वासः नयेत अस्पताल हे वयाच्वनेमाः धइगु मदु। थःत पायक जूगु थासय् वनाः वासः नयेफु। तर झीथाय् धाःसा गंल्वय् जुल धाःसा उकियात सुचुकेगु चलन दु। उकिसनं ल्यासेपिं मिस्तय्त ल्वय् जुल धाःसा कन्हय् वनाः बिहावारीया समेत समस्या वइ धकाः झन् हे सुचुकेत स्वइ। गंल्वय् गुलि सुचुका तल उलि हे तच्वः जुयावनीगु जुयाः थुकियात सुचुकेगु मखु कि इलय् हे वासः यानाः लंका छ्वयेमाःगु खँ भाजु कर्माचार्यं कनादी।
जीरो फिगरं यानाः टीबी जूपिं नच्चापिं मिस्तय् पाय्छि ल्याः थुलि हे दु धकाः सीके मफुसां अस्पतालय् अज्याःपिनि ल्याः धाःसा न्हापा स्वयां झन् झन् अप्वया वयाच्वंगु खँ धाःगु दु।