हाकनं मेम्ह सभासद् ज्वन

येँ(सन्ध्या टाइम्स)/कुटनीतिक पासपोर्ट दुरुपयोग याःगु द्वपनय् प्रहरीया केन्द्रीय अनुसन्धान ब्यूरों यानाच्वंगु अनुसन्धानया झ्वलय्. सत्तारुढ पार्टी नेकपा (एमाले)या सभासद् नारदमुनी राना थारुयात ज्वना यंकूगु दु। प्रहरीं वय्कःयात बालं च्वनाच्वंगु क्वथाय् हे वनाः ज्वंगु खः।
येँया अनामनगरया छखा छेँय् बालं च्वनाच्वंम्ह सभासद् थारुयात अनं हे ज्वना यंकूगु खः। वय्कः एमालेया समानुपातिकपाखें ल्यया वःम्ह सभासद् खः। कुटनीतिक अर्थात ह्याउँगु पासपोर्ट दुरुपयोग याःगु द्वपनय् ज्वंम्ह भाजु राना थारु स्वम्हम्ह सभासद् खः।
कैलाली जिल्लाया धनगढी नगरपालिका निवासी राना २०४३ सालंनिसें एमालेय् आबद्ध जुयाच्वंम्ह खः। राना थारु व्यवस्थापिका संसदया नागरिक सम्बन्ध समिति व विकास समितिया दुजः जुयाच्वंम्ह खः।
रानां कयातःगु कुटनीतिक पासपोर्टय् फोटो तिकाः ई-टिकट नम्बर ६०७-२७४९६९४०५७ पाखे ब्वयावंम्ह छम्ह मनू ११ डिसेम्बर २०१० कुन्हु अस्ट्रेलिया थ्यंगु खः। उम्ह मनू आः तक नं अष्ट्रेलियाय् हे दनिगु खँ नेपाल प्रहरी व येँया अष्ट्रेलियन दूतावासं पुष्टि याःगु दु।
प्रहरी नापं अख्तियार दुरुपयोग अनुसन्धान आयोगं नं थुगु विषयय् अनुसन्धान यानाच्वंगु दु। इतिहाद एअरया इएक्स २११ नम्बरया उडानपाखें उम्ह मनू अष्ट्रेलिया ब्वःगु खँ नं प्रहरीया अनुसन्धानं सीगु दु। दरवारमार्गस्थित जया ट्राभल एन्ड टुर्सपाखें वं टिकट न्याःगु खः।
अथे हे फोरमया सभासद् शिवपुजन राय यादवं नं कुटनीतिक पासपोर्ट दुरुपयोग याःगु विषयय् प्रहरीं छानविन यानाच्वंगु खँ सीदुगु दु। सभासद्पिं राना व यादवया पासपोर्ट न्याना कापिं निम्ह मनूत छन्हुं हे अष्ट्रेलिया थ्यंकः वंगु खँ नं अनुसन्धानं पत्ता लगे याःगु दु।
थ्व स्वयां न्ह्यः मधेसी सभासद बीपी यादव व गायत्री साहयात नं कुटनीतिक पासपोर्ट मिउगु हे द्वपनय् अख्तियारं ज्वनाः मुद्दा चले याःगु खः। थ्व निम्हं सभासद्तय्त थौकन्हय् ध्यबा धेरौटी कयाः त्वःता तःगु दु।