सशस्त्र क्रान्ति यायेगु पाय्छि ई

कृष्ण प्रजापति

देशय् प्रधानसेनापति विवादं आखिर सरकार तकं क्वःदःगु दु । न्हूगु सरकार दयेकेगु ज्याय् नं पार्टीत व्यस्त जुयाच्वंगु दु । स्वयम् झिंनिदँ तक समाजवादी गणतन्त्र स्थापना यायेगु मितं सशस्त्र युद्ध यानाः उगु इच्छा पूवंके मफयेवं पुँजीवादी गणतन्त्रयात हे समर्थन यानाः गुला तक सरकारय् वंगु नेकपा एकीकृत माओवादी नं सरकारय् गुकथं थःपिंसं नेतृत्व प्रदान याये फइ धइगु खँय् चिन्तित जुयाच्वंगु दु । थथे स्वयेगु खःसा माओवादी नं वास्तवय् समाजवादी क्रान्ति यायेगु पक्षय् मदु धइगु सीदु । समाजवादी क्रान्ति यायेगु ई धाःसा थ्व तसकं हे बांलाःगु ई खः । देशय् संक्रमण जुयाच्वंगु इलय् हे यदि शान्तिपूर्ण संक्रमण मधासे सशस्त्र संघर्ष धकाः युद्ध मार्फत सत्ता कब्जा यायेगु खःसा उगु ज्या पाय्छि नं जुइफु । खय्त ला थःगु सरकार क्वःथलीगु छुं छुं संकेत दुगु इलय् हे प्रधानमन्त्री पुष्प कमल दाहाल 'प्रचण्डं' यदि वर्तमान सरकार क्वःथल धाःसा सशस्त्र विद्रोह मार्फत सत्ता कब्जा यायेगु ख्याच्वः बियादीगु खः । तर सरकारं राजीनामा बीधुंकाः धाःसा पत्रकार सम्मेलन यानाः शान्तिपूर्ण संक्रमण यायेगु व शान्ति सम्झौतायात पंगः मथनेगु कथंया नरम नीति काःगु जानकारी बिउगु दु । कडा नीति ज्वनेमाःगु इलय् क्रान्ति खनाः ग्याना जुइगु व जनता तयार मजूनिगु इलय् धाःसा ततःधंगु क्रान्तिया खँ ल्हानाः जनतायात दिग्भ्रमित यायेगु पाय्छि मजू ।

थ्व ई सरकार कमजोर जुयाच्वंगु ई खः । नेपाली जनता नं आः छु जुइ अले छु जुइ धकाः प्रधानमन्त्री पुष्पकमल दाहालया राजीनामाया भाषण टेलिभिजनय् आतुर जुयाः न्यनाच्वंगु ई खः । अथे धइगु नेपाली जनतां नं पुँजीवादी गणतन्त्रं वास्तविक जनताया सेवा याये मफइगु जुयाच्वन थन ला समाजवादी गणतन्त्र हे माः अले जक क्यूबा भियतनाम लाओस उत्तर कोरिया व चीनय् थें समानता न्याय व प्रजातन्त्र वास्तविक जनतां उपभोग याये खनीगु जुयाच्वन धकाः सीधुंकूगु ई खः । अथे खयां नं थीथी राजनीतिक पार्टीतय्के सेना मदुनिगु ई खः । दुसां उमित बांलाक परिचालन यायेगु तागत मदुनिगु ई खः । फुसा नेकपा एकीकृत माओवादीं हे जक सशस्त्र विद्रोह वा क्रान्तिया लँ ज्वनाः थ्व ई सदुपयोग यानाः रुसय् फेबु्रअरी क्रान्ति लिपा अक्टोबर समाजवादी क्रान्ति याःगु ई थें क्रान्ति यायेगु बांलाःगु ई खः । तर थुखेपाखे पार्टी नेतृत्वं ध्यान मतःगु धइगु पुँजीवादय् थ्व पार्टी फँसे जूवंगु हे खः ।

समाजवादी गणतन्त्रया खँ ल्हाइगु पार्टीयात तकं बेमौसमी बाजं थाइगु पार्टीया द्वपं बियाच्वंगु कारणं जेठ ३ गते याःगु खुल्लामाचया सभां छुं विशेष घोषणा याइ धइगु नं नेपाली जनतां बिचाः मयाःगु हे खः । वास्तवय् पुलांगु हे नीति जक स्पष्ट यानाः थ्वहे पुँजीवादी बन्दोबस्तयात निरन्तरता बीगु खँ जक अन जाहेर जुल । जनयुद्ध यानाच्वंगु इलय् हे माओवादीं तत्कालीन सरकार समक्ष हतियार सहित राजधानीइ प्रदर्शन यायेगु धाःगु खः । उगु इलय् धाथें हे उकथं प्रदर्शन याकूगु खःसा शायद खुल्लामाचं हे तत्कालीन पुँजीवादी सरकार भंग जूगु घोषणा यानाः देशय् जनयुद्धया माध्यमं न्हूगु समाजवादी गणतान्त्रिक ब्यवस्था हे स्थापना जुल धकाः घोषणा याइगु जुइफु । उगु ई नं देशय् समाजवादी गणतन्त्र घोषणाया लागिं पाय्छि ई हे साबित जूगु खः । तर सरकारं गुगुं नं हालतय् उगु ज्या याके बी मखु धकाः माओवादीयात तप्यंक हे पनाबिल । वार्ताय् वयाच्वंपिं माओवादीयात बरु युद्धय् हे लिहां वंसां उगु ज्या याके बी मखु धयाः तत्कालीन कांग्रेस-एमालें पुँजीवादी बन्दोबस्तयात हे पाय्छि कथं स्थापना याना तयेगुली अबलय् महत्वपूर्ण भूमिका म्हितूगु खः ।

ई हिलाः हिलाः अन हे थ्यंकः वइगु जुयाच्वन । थौं माओवादीं चाहे जूसां मजूसां माओवादीया पुलांगु चाहना कथं हे समान ज्याला समान अवसर समान न्याय व फुकसियां नये त्वने खनीगु बन्दोबस्त समाजवादी गणतन्त्र देशया आवश्यकता जूवने धुंकूगु दु । अले अथे न्हूगु बन्दोबस्तया लागिं न्हूगु क्रान्ति यानाः सशस्त्र विद्रोह मार्फत सत्ता कब्जा यायेगु पाय्छि ई नं थ्वहे खः । खय्त ला क्रान्ति यायेगु नितिं बैंस ई वा छुं नं चीजं पंगः थने फइ मखु । तर राजनीतिक परिस्थिति व अन्तर्राष्ट्रिय परिवेशं नं आपालं भूमिका म्हितीगु जुयाच्वन । भारतय् कांग्रेस आईया सरकार कायम जूगु ई । थौं हाकनं प्रचण्डं हे धाः थें नेपालय् सुना नं हे बिचाः मयाः थें कम्युनिष्टत अप्वया वनाच्वंगु दु । विश्वय् हे कम्युनिष्टत रक्षात्मक स्थितिइ लानाच्वंगु इलय् नेपालय् धाःसा कम्युनिष्टत बिचाः हे मयाः थें अप्वःगु धइगु कि व नकली कम्युनिष्ट जुयाः अप्वःगु खयेफु मखुसा थ्व पिनेया मनूतय्सं हे अप्वयेकेत ग्वाहालि याःगु कारणं अप्वः खने दुगु खयेफु । इमान्दार कम्युनिष्ट वा धाथेंया समाजवादीत हे अप्वः जुइ मफयेकं देशय् क्रान्तिकारीत अप्वयेवं हे क्रान्ति जुइ धइगु म्हगसय् हे मम्हंसां जिउ । अथे जुयाः नं थौंया संक्रमणकालीन इलय् लाक्क हे नेकपा एकीकृत माओवादी थेंज्याःगु थः हे सेना दुगु पार्टीं विद्रोह तच्वयेकाः न्हापा थें हे ब्यारेक दरवार व फुक्कं पुँजीवादी संरचनात कब्जा यायेगु खःसा थौंया ई समाजवादी गणतन्त्र घोषणा यायेगु बांलाःगु ई नं जुइफु । उकिं हे जक देशय् आमूल परिवर्तन जुइ ।


क्रान्तिया नारा बीगु तर जनता क्रान्तिया लागिं तयार जुइगु इलय् क्रान्तिया लँपु हे त्वःताः वनेगु काँतर वा नकली नागया शोखिन जुइगु उपाय जक खः । सकली नाग हे वइगु इलय् ग्यानाः बिसिउँ जुइगु खःसा नकली नागया जक पूजा यानां छु यायेगु वास्तवय् नेपाली जनतां चाहे जू थें शासन सत्ता कायम यायेगु खःसा उगु शासन सत्ता पूर्ण अवधि व दीर्घकालीन रुपं नं टिके जुइ । झीगु देशय् २००७ सालया क्रान्ति पूवंसांनिसें भारतीय हैकम चले जुयाच्वंगु कारणं जुइफु भारतं हे दयेका बिउम्ह प्रधानमन्त्री मोहन शमशेरया प्रधानमन्त्रीकालंनिसें थौं माओवादी अध्यक्ष प्रचण्डया प्रधानमन्त्रीकाल तकं पूर्ण अवधि धइगु छक्वः हे पूमवंनि । अथे जुयाः आः नं विदेशी हस्तक्षेप प्रत्यक्ष वा परोक्ष रुपं ल्यना हे च्वनी तिनि धइगु सीदु । देशय् आमूल परिवर्तन हयेगु नितिं थज्याःगु देशीविदेशी शक्तियात नं सदांया लागिं नष्ट यानाः न्हूगु नेपाःया सिर्जना हे थौंया दकलय् तःधंगु राजनीतिक लाइन जुइफु ।

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया