किपुलिइ नागरिक अनुगमन समिति

किपू (झीगु स्वनिगः)

किपू नगरपालिकां याःगु विकास निर्माण नापं थीथी ज्यायात जनस्तरं अनुगमन यायेगु नितिं म्हिगः नागरिक अनुगमन समिति गठन याःगु दु । नेवाः स्वायत्त राज्य मंकाः परिषद् किपूपाखें म्हिगः शनिवाः किपू नगरपालिकाया न्हूगु बजेटया बारे याःगु सर्वपक्षिय सहलह मुँज्यां कीर्तिपुर इन्जिनियरिङ समाजया संयोजकत्वय् अथे अनुगमन समिति नीस्वंगु खः । अनुगमन समितिया दुजलय् कृष्णहरी महर्जन, तिकाराम मजर्हन, बज्रमुनि बज्राचार्य, केशरत्न महर्जन, प्रणय सिंह मुना व न्हूच्छेमाया महर्जन च्वनादीगु खः । किपू नगरपालिकां ज्या याःगुलिइ गुणस्तर मगाःगु नापं न्ह्यःनेलाःथे ज्या यानाच्वंगु जनतातय्गु गुनासो वयाच्वंगुलिं नागरिक स्तरं अनुगमन यानाः सरोकारवालातय्त दबाव बिइगु नितिं अथे अनुगमन समिति नीस्वंगु खः ।

नेवाः स्वायत्त राज्य मंकाः परिषद् किपूया नायः पुचःया कजि पंचलाल महर्जनया सभापतित्वय् किपूया सभासद् दिलिप महर्जन मूपाहां जुयादीगु उगु ज्याझ्वलय् न्हूगु बजेट नेवाः स्वायत्त राज्यया अवधारणा कथं जुइमाः धकाः अन ब्वति कयादीपिन्सं बहः बियादीगु खः । परिषद्या नायः पुचःया दुजः नजरराम महर्जनं गुला तक कारागारय् जीवन हनाः वय्कःयात सफाई बियाः हःगुलिं सिन्हः तिकाः लसकुस यायेगु नं ज्या जूगु खःसा ज्याझ्वलय् नायः पुचःया दुजः राममान सिंह लसकुस न्वचू बियादीगु खः । परिषद्या छ्याञ्जे श्रीकृष्ण ज्यापुं न्ह्याकादीगु उगु ज्याझ्वलय् नायः पुचःया दुजः कृष्णहरी महर्जनं सुभाय् न्वचू बियादीगु खः । किपू नगरपालिकाया न्हूगु बजेटयात कयाः सल्लाहकारपिं डा. शिवशरण महर्जन, कुलबहादुर महर्जन, बज्रमुनि बज्राचार्य, टिकाराम महर्जन नापं मेमेपिन्सं नं थःथःगु नुगःखँ प्वंकादीगु खः ।