नेवाः मंकाः दबू छेँ दयेकेत गुथि

श्रीकृष्ण महर्जन

ता ई न्ह्यःनिसें येँया भाषा ख्यःया नेता व कार्यकर्तातय्सं आशा यानाच्वंगु नेवाःतय्गु मंकाःगु छेँ अन्ततः पूवनीगु अवस्थाय् थ्यंगु दु । येँ महानगरपालिका वडा नं. १५या डल्लुइ च्वंगु १ रोपनी १२ आना २ पैशा जग्गाय् अथे छेँ दनीगु ज्या पूवंकेगु नितिं कुतः जुयाच्वंगु दु । ता ई न्ह्यःनिसें नेवाःतय्सं आशा यानाच्वंगु लिबाक्क जूसां नेवाः दबू छेँ दयेकी धकाः आशा यानाच्वंगु खः । येँया नेपालभाषा मंकाः खलःया नामय् दुगु जग्गाय् अन्ततः मंकाः खलः नापं नेपालभाषाया आन्दोलया न्ह्यलुवाःतय्गु कुतलय् नेवाः मंकाः दबू छेँ दयेकेगु नितिं गुथि हे दयेकीगु जूगु दु । नेवाः मंकाः दबू छेँ गुथि धकाः दयेकेगु खँय् नेपालभाषा मंकाः खलःया प्रतिनिधि नापं सरोकारवालातय् दथुइ छुं ई न्ह्यः जक सहमति जुल धकाः सूत्रं धाःगु दु । उगु नेवाः मंकाः दबू छेँ बहुआयामिक जुइ धकाः सूत्रं धाःगु दु । उगु छेँ दयेकेगु नितिं वंगु छुं दिं न्ह्यः जक उगु जग्गाया पूर्जाय् नां दयाच्वंपिं नेपालभाषा मंकाः खलःया नायः पद्मरत्न तुलाधर, जनकवि दुर्गालाल श्रेष्ठ, मल्ल के सुन्दर व मदये धुंकूम्ह काजिलाल श्रेष्ठपाखें वय्कःया काय् प्रविणलाल श्रेष्ठ, नेवाःतय्गु राष्ट्रिय संगठन नेवाः देय् दबूया नायः नेवाः मंकाः दबू छेँ गुथिया पदेन सदस्य यायेगु खँय् सहमति जूगु दु । अथे हे उगु गुथिइ नेवाः ख्यः नापं थीथी ख्यलय् ख्यातिप्राप्त नेवाः ब्यक्तित्वपिं दुजः कथं दुथ्याइ धकाः धाःगु दु । नेवाः मंकाः दबू छेँ गुथियात विधिवत रुपं दर्तायानाः संस्थागत यानाः यंकेगु धकाः तकं सहमति जूगु दु । उगु नेवाः मंकाः दबू छेँय् नेवाःतय्गु थीथी कथंया ज्याझ्वः यायेगु नितिं हल, पिने वयाच्वंपिं नेवाःत च्वनेगु नितिं छगू कथंया अतिथि गृह, नेपालभाषा मंकाः खलःया ज्याकू, नेवाः देय् दबूया ज्याकू व छगू कथं नेवाःतय्गु म्युजियम तकं तयेगु धकाः थौंसिबें स्वला/प्यला न्ह्यःनिसें हे सरोकारवालातय् दथुइ सहलह ब्याकाः सहमति यायां वयाच्वंगु खः ।

नेवाः न्ह्यलुवाःतय्सं लिबाक्क हे जूसां नं अथे नेवाः मंकाः दबू छेँ दयेकेगु नितिं गुगु कथं गुथि हे दयेका न्ह्याः वनेगु धकाः कुतः यानाच्वंगु नापं आन्तरिक तयारी यानाच्वंगु खँ स्यूपिं येँया नेवाःत तसकं लय्तायाच्वंगु दु । आः नेवाः मंकाः दबू छेँ गबले स्वये दइ धकाः पियाच्वंगुयात नेवाः न्ह्यलुवाःतय्सं याकनं हे पूवंका क्यनी धकाः आशा यायेगु थाय् दु । लुमंके बहःजू उगु नेवाः दबू छेँ व उगु जग्गाया बारे नेवाः संचार माध्यमय् इलय् ब्यलय् समाचारत पिथनाच्वंगु दुसा येँया नेवाःतय् दथुइ इलय् ब्यलय् अनौपचारिक रुपं जूसां चासो तयाः सहलह ब्याकेगु ज्या ताः ई न्ह्यःनिसें यानाः वयाच्वंगु खः ।