थौं सरकारं नीति लिसे ज्याझ्वः न्ह्यःब्वइगु

'समावेशी बजेट हयेगु जुइ’

येँ (झीगु स्वनिगः)

वर्तमान संयुक्त सरकारं थौंया व्यवस्थापिका संसदया मुँज्याय् दच्छिया नितिं नीति तथा कार्यक्रम हइगु जूगु दु । एकीकृत नेकपा -माओवादी) नापं अप्वः यानाः व्यवस्थापिका संसदय् दुथ्याःगु वाम दलतय्गु समर्थनय् दयेकूगु वर्तमान सरकारं नेपाःमि जनताया चाहाना कथं फुक्क हे क्षेत्रयात कःघानाः न्हूगु बजेट हयेगु नितिं तयारी यानाच्वंगु खः । थ्व हे झ्वलय् वर्तमान सरकारया उपप्रधान नापं अर्थमन्त्री भरतमोहन अधिकारीं न्हूगु बजेट फुक्क हे क्षेत्रयात कःघाइगु कथंया समावेशी विधेयक हयेगु जुइ धकाः धयादीगु दु । नेकपा -एमाले)या केासी अञ्चल सम्पर्क कमिटीं म्हिगः शनिवाःयेँय् ग्वसाः ग्वःगु न्हापांगु प्रतिनिधि परिषद्या बैठक उलेज्या यानादिसें अर्थ मन्त्री अधिकारीं आर्थिक वर्ष २०६८/६९या वर्तमान सरकारया न्हूगु बजेटय् फुक्क क्षेत्रयात कःघायेगु जुइ धकाः धयादिल ।

उपप्रधान नापं अर्थमन्त्री अधिकारीं थ्व हे असार ३० गते प्रस्तूत जुइगु बजेट समावेशी कथं फुक्क क्षेत्रयात कःघायेगु जुइ धकाः स्पष्ट नं यानादिल । वय्कलं धयादिल 'बजेटं बरोजगार युवा, कृषि उत्पादनय् अप्वयेकेगु, हलिया, कमैया थेंज्वःगु प्रथायात समाधान यायेगु कथंया वइ । बजेटं छुं नं क्षेत्र, छुं नं समुदाययातसिबें नं समावेशी कथंया वइ, आः लजगाःया नितिं युवात विदेशय् वने मालीमखु ।'
शान्ति प्रक्रिया व संविधान च्वयेगु ज्या क्वचायेकेगु नितिं वर्तमान सरकार प्रतिबद्धता दु धयादिसें उपप्रधान नापं अर्थमन्त्री भरतमोहन अधिकारीं शान्ति प्रक्रिया व संविधान च्वयेगु ज्या नेपाःमि जनताया मंकाः जूगुलिं फुक्क राजनीतिक दल छप्पँ छधी जुयाः न्ह्याः वनेमाः धकाः बहः बियादिल । एमाले शान्ति व न्हूगु संविधानया पक्षय् दुगु धयादिसें अर्थमन्त्री अधिकारीं एमालेया हे नेतृत्वया सरकारं हे शान्ति व संविधान च्वयेगु ज्या पूवंकीगु खँय् थः विश्वस्त दु धकाः नं दावी यानादिल । संविधानसभाया चुनाव धुसांनिसें बजेट इलय् हे हये मफयाच्वंगु अवस्था खःसा सथुगुसी ताः ई न्ह्यःनिसें हे कुतः यानाः वर्तमान सरकारं इलय् हे बजेट हयेगु तयारी याःगु खः । इलय् हे न्हूगु बजेट हयेगु नितिं कांग्रेस तकं लिपांगु इलय् सकारात्मक जुयाः वःगु खः ।