जि म्ह्याय्‌मचा

निजिरोस श्रेष्ठ (न्याछ्यों)

थ्व अस्पतालय् नर्स जुयाः ज्या यानागु नं न्हय्दँ, च्यादँ हे दय् धुंकल का । थन धाःसा न्ह्याबलें छगू हे इलय् डयुटी लाइगु मखु, डयुटीयार ई गबलें सुथय्, गबलें न्हिने अले गुबलें बहनी लाइगु का । धाय् हे मफुका । थौं नं जिगु नाइट डयुटी जूगुलिं जि व पासा अंजलि फुक्क वार्डय् चाहिला वयाः सुथया स्वता इलय् अफिसय् फय्तू वया । उफ ! थौं जितः गथे गथे तस्संक त्यानुसे चाया च्वन, अले मनय् नं छु जू छु खुल्ल मिनाच्वन का ।

सुथसिया च्याता इलय् जिपिं निम्हेसियां डयुटी फ्रि जुइगु । न्हापा लिपा जूसा जिपिं थथे नाइट डयुटी लाइबले डयुटी फ्रि जुइकथं हथाय्पथाय् छेँ वनाः द्यं हे वनेगु का । तर कन्हय्ला द्यं वनेगु ला चान्स हे मदु । छाय्धाःसां कन्हय् ला गुंपुन्ही जूगुलिं छेँ नं क्वन्ती द्येके वनेगु, अले क्वाति दाय्केगु फुक्क ज्या याः वने मानिका । तै थौं थन अस्पतालय् न्हूपिं बिरामी महःगु व पुलांपि बिरामी त नं याउँक द्यनाच्वंगुलि लकस शान्त जुयाच्वंगुलिं भचा सां जिमि फुर्सद दयाच्वन का ।
- खुसी, कन्हय् थनं लिहाँ वनां क्वन्ती द्येके वने ला ?
अचानक अनया शान्तियात भंग यानाः पासा अंजलि जिके न्यन ।
- अहं, जि वनांच्वने मखु, आठ बजे थनं लिहाँ वनां फ्रेस जुयाः द्येके वने बले ला तस्सकं लिबाइ का, बरु नय् त्वने धुंका न्हिनय् जक वने मालीका, जिं लिसः बिया ।
- अँ, अथे हे याय् मालीका जि नं धकाः अंजलि धाल ।
अचानक अस्पतालया शान्त वातावरणयात फायाः फोनया तिस्सगु सः 'तिरर तिरर' न्यात । ओहो । सुयागु फोन जुइ धकाः जिं काचाक्क फोन न्ह्वना । हेलो, जक जिं छु धया उखे मिसाम्हेसियागु चिच्चादंगु सः थ्वल, हेलो, हेलो खुसी खःला, खुसी खःला धकाः, जि ला मन हे भाराक्क मिन । थ्व सःला जिमि हे मांया खनी ।
- छाय्, छाय्, छु जुल, छु जुल ? जिं न्यना उखें मांया सः वल
- खुसी, थन छिमि बायात छु जुल छु स्वले होस मदुगु ला न्ह्यो वःगु लाः नकतिनि हे दनां 'जि लिसे कन्हय् याकनं अफिस वने मानी, भचा न्ह्यथ्याक जा थुया ब्यु न्है' धकाः खँ ल्हानाः च्वंम्हला मिखा तिसिनाहल । जिगु हे म्ह्य् भ्वःपु वल, न्ह्यो वःगु ला न्यनां नं छु हे मधाः, तर म्हुतु धाःसा न्हिला च्वंम्ह थें च्वं धकाः छगू हे सासलं धयाः हल ।

जि हरबराय् चाल आसे बायात छुं हे याय् मते, याउँक ग्वतुका ति, संके नं मते धकाः फोन दिकाः काचाकिचि कान्छादाइयात एम्बुलेन्स पिकाय्त धयाकथं जिं अस्पतालय् बांलाक स्व न्है धकाः अन्जलियात धयाः कुहाँ वना ।

छेँ वनां स्वयां ला बाया खव ल्हाः व खव तुति याता प्याता च्वं, अले म्हुतुइ नं खवय् पत्ति भचा थहाँ वनां न्हिलाः च्वंम्ह थें च्वं । जित शंका जुल ब्रेन स्ट्रोक जकं जूगु मखु ला धकाः । अथे जुयाः काचाकाचा अस्पतालय् हया । अस्पतालय् हया डाक्टरं फुक्क जाँचय् याना स्वःबले ला न्ह्यपुइ नसा छपु चःबुना हि भतिचा ख्वःगु खँ कन । उकिं बायात बांलाक हेरविचार या अले छुं हे टेन्सन बीमते धकाः धाल । थः नर्सया हे पेशाय् जूगुलिं जिं बायात हेरबिचार याय्गुली छुं हे कसर मतया । मां या धाःसा अस्पतालय् हे गुभाजु ब्वनाः हयाः झारे याके हल । उचित हेरविचारं यानाः बाया स्वास्थ्य सुधार जुया वल । लिपा छेँ यंका नं उत्तिकं हे सुसाः कुसाः याना ।

छपा ल्हाः व छपा तुति बांलाक संके मफुगु व खँ ल्हाय्बले नं लरबरय् जूगुलि बाया धाःसा तस्सकं दिक्क जुल । जिं बायात दिक्क जुइ म्वाःगु अले यक्व मनूतय् थजागु केस लंगु खँ नं बांलाक ध्वाथुइका बिया । तर बाया धाःसा शंका जक जुयाः थःगु दुगु जागिर नं त्वःताबिल । तर जि निराश मजुया दृढ विश्वास याना यक्व ध्यान बियाः सुसाःकुसाः याना तुं च्वना ।

थथे हेरविचार याय्गु झवलय् निला फुनां स्वला नं क्यन । आःला बाया ल्वय् ला बांलाक हे लन थें च्वं । न्हापा थें हे नय्गु त्वनेगु व मेमेगु ज्या याय् फया वल । तर सः भतीचा चीसः जुथें जक जुल । धन्य ! भगवान् द्यवं जिगु सेवायात साकार यानाबिल ।

आःला छेँया फुक्क भार जिं हे क्वबी माल । छेँया निंति खर्च चूलाकेगुनिसें कयाः वासः न्याः वनेगु, छेँया निंति माःमाःगु सामान न्याय्गु व मेमेगु फुक्क व्यवस्था याय्गु भार फुक्क जितः वल । मां नं बांलाक फुगु मखु । अथे जुयाः इलय् ब्यलय् भुतूया ज्या नं जिं हे याय् माः । अय्सां जि छतिं हे उसि मचाया जि जिमि बाया कान्छिम्ह म्ह्याय्मचा जुया नं छेँया फुक्क व्यवस्था याय् जि सफल जूगुलिं थौं जिमि अबुया जि खनां तस्सकं लय्ता वः ।

थौं जिमि अबुया ख्वाः स्वय्बले थः म्ह्याय् नं छेँया निंतिं याःगु ज्या बौप्रतिया सेवाभाव खनां लय्ता, गर्व नापं पश्चाताप नं खने दु थें च्वं । जिं बायात उत्तिकं माया यानां वासः नकाबले वासः न नं सायद बाया न्हापा थःम्ह म्ह्याय्मस्तय्त यानागु अन्याय वा काय् व म्ह्याय् प्रति यानागु पनपक्ष लुमना नुगः मछिना वल ला छु थें मिखा ल ल धया वल खनी । विस्तारं थःगु पाइन्टया म्हिचां पकेट रुमाल पिकना मिखा हुल । थथे बाया मिखां ख्वबि वःगु खनां छु जुल बा ? धकाः जिं न्यना । बा नं छुं न मजू धकाः छयों संकल । अले जिगु छय्नय् तस्सकं माया यानां पित्तुपिल ।

थथे बाया तःधंगु ल्वय् जुयाः लसांनिसें बायाके छगू अजूचयापूसे च्वंक हृयूपा वःगु जिं खना । थौकन्हय् ला जिमि अबुं जि मयोम्ह म्ह्याय्यात तस्सकं माया याय्गु याना हल । जि मफइ, जित थाकुइ धकाः फयांफक्व थःपिन्सं फु चाःगु ज्या यानां ग्वहालि बीगु नं याना हल । अथे हे दुमकाःपिं तःधिकम्ह व माइलिम्ह म्ह्याय्मस्तय्त नं छेँ दुकाल । थथे जित वा म्ह्याय्मस्त प्रति जिमि अबुया सकारात्मक सोच वःगुलि थौंकन्हय् जिगु मन नं याउँसे च्वं । नत्र जि म्ह्याय् जुयाः जिं गुलि भावनात्मक एवं शारीरिक रुपं दुख सी धुन धकाः जिं हे स्यू का ।

खः जि जिमि मां अबुया मय्यक बूम्ह स्वम्हम्ह म्ह्याय् । निम्ह फासिं म्ह्याय् बुइकि धुंकाः काय् बुइला धकाः आसं बुइकुम्ह जि म्ह्याय्मचा । हाकनं म्ह्याय् ओहो ! गुलिजक म्ह्याय् बुइकूगु जुइ थ्व मिसां जिमि अबुया मयो पहगु सः । थ्व हे खँपु पिकया जिमि अबुं जिमि मांयात तुंक मिखां स्वयाः पिहाँ वंम्ह स्वन्हु तक छेँ दुहाँ मवः हँ । मचा बूम्ह जिमि मांयात बिचाः याना नके त्वंके याय्गु ला गन गन का ।

व दिन जिमि मांया सुथय् सकसितं जा नकाः च्वंबले अचानक प्वाः स्यागु खनां जिमि अजिं काचाकाचा दिदि अजियात सःत वन हँ । उबले जि प्वाथय् न्हय्ला तिनि दुगु हँ । ओहो ! न्हय्लां बूपिं मस्त भाग्यमानी जुइ धाइ, थ्व पक्का हे काय् जुइ धकाः जिमि अबु लय्ताया काचाकिचि पिहाँ वनां दुगु छम्ह न्याः वंगु हँ । काय् बुइखतं सकसितं दुगुया ला नके धकाः ।

जिमि मांया धाःसा काचाकिचि बरोबर मचा बुइकेगु चीकूगु ख्यूँसे च्वंगु क्वथाय् सुया लासा मिले यानाः तयार जुयाः च्वंगु । जिमि ततापिनि नं जि काय् हे जुइ धकाः गुलि उत्सुक जुयाच्वन । तर जि बुइवं अन च्वंगु लकस हे हिल । जि ला म्ह्याय्मचा, जि बुइवं जिमि अबुया तस्सकं तँ पिहाँ वयाः खापाय् निथु लाकमं च्वानां जिमि मांयात तं क्यनाः दुगु लित ज्वनाः पिहाँ वन हँ, जिमि मां ह्वाँय् हृवाँय् ख्वल हँ, अले जिमि ततापिं निम्हं जिल्ल जुल हँ, जिमि अजि नं त्वलय् जुल हँ । थथे जिगु जन्मयात सुनां नं लसकुस मयाः खनी । जि छम्ह मय्क मय्क बूम्ह म्ह्याय्मचा ।

तर अथे जूसां जिगु नां खुसी हँ । थ्व नां जित जिमि अजिं तःगु हँ । जिमि अबुया मयय्क बूम्ह जि म्ह्याय्मचा जूगुलिं हे सायद द्यवं जितः हिसिचा दय्क न्ह्याबलें न्हिलाः लय्ताया च्वनीम्ह मचा दय्काः हल जुइ । जि मचाबले ख्वय् हे मसः हँ । ई वंलिसे न्ह्याम्ह खँसां न्वाना च्वनीम्ह हँ । सायद द्यवं थ्व मचा थःम्ह हे थःत यय्क च्वने सय्केमाः धकाः जित थ्व उपहार बिया हःगु जुइमाः । अंग्रेजी धाइनि God gift.

अपाय्सकं स्वय् हे ल्वःवनापुस्ये च्वंम्ह मचायात नं जिमि अबुं मिखां छक हे वाय्काः मस्वः हँ । काय् बुइकेगु इच्छां जिमि मांया हाकनं प्वाथय् दत हँ । दच्छि हे मपाक जि झिंनिला दय्वं जिमि मांया हाकनं मचा बुइत ब्यथा जुल । काय् बुइला म्ह्याय् बुइला जिमि मांया म्हय् जिउ हे मदु । म्ह्याय् बुल धाय् छु याय् ? हाकनं न्हापाया थें हे मार नय् माली । हे ! भगवान जित आःया पालय् काय् हे बुइका ब्यु । जित हाकनं हाकनं मचा बुइकाः च्वने मंमंत । जिमि मांया करुणां थ्वःगु सः न्यनाः सायद द्यःया नं माया वन जुइमाः । थुसी ला जिमि मांया काय् हे बुल ।
काय् बुल हँ । ओहो ! सकलें लय्ताल । जिमि अबुया ला ख्वा हे चक्कन, मानौं तःधंगु लडाँइ हे त्याकाः वःम्ह थें । 'का का बौम्हेसित कोट तोकि' धकाः जिमि अबुयात अन वःपिं जिमि थःलापिंसं हाय्कल । हर्ष उमंगया लकस थन खने दत । मानौं व काय्मचां आ थथे हे कमय् यानाः नकी थें । जिमि अबुया तुतिं हे बँय् मचुल । ब्वाँय् ब्वाँय् वनाः जेरी स्वारी न्यानाः हयाः सकसितं नके हल ।

जिमि किजा व जि दच्छि हे मपाःपिं, तर जि ला बुरि हे जुइ धुंकल हँ । नय्गु, त्वनेगु निसें कयाः हरेक व्यवहारय् यक्व पात । जि जिमि अजि व ततापिनि जिम्माय् जुल । जिमि किजा ला सिस्वाँ थें का । वयात छुं जुइ धकाः जिमि अबु तस्सकं ग्याः सेखं जक चाःसां डाक्टर क्यने माःगु, अले जित धाःसा न्ह्याग्गु जूसा मतलब मदु । जि चाहिं फकं हँ, अथे हे ह्वासा ह्वासा थहाँ वइ हँ । वया काय्यात तितिपापा यानाः तयाः सासागु भिंभिंगु नकेगु जुल ।

छन्हु मखु निन्हु मखु । जिमि अबुं सुथ न्हापं जिमि किजायात नकेत क्वाः क्वाः जेरी स्वारी न्यानाः हइगु का । अले जिपिं म्ह्याय्मस्तय्त पुलपुलु क्यनां थः काय्यात जक नकीगु का । अझ जिमिसं खनी धकाः फस्वया जिमित किनाः नकीगु का । गपाय्सकं मन चीधं धाय्, जिमित छकू छकू बी मज्यूला ? जिमि गुलि नुगलय् स्याः बयान यानाः साद्दे हे मजू ।

काय्यात सुसाकुसा याय्गु झवलय् जिपिं म्ह्याय्पिं स्वम्हं छखे लाः का । जिपिं फुक्कं छखे तयाः काय् छम्ह मेखे तयाः लंसा व हे याकः काय् झयातुसे च्वं जिमि अबुया निंतिं ।

तर जिमि मां, आखिर मांला खः । वयात हरेक मचा बुइकूबले नं उलि हे कष्ट । पुता सकलें माया वं । तर जिमि अबुं बीगु ख्याच्वया हुनिं म्ह्याय्मस्तय्त बांलाक स्वय् मफु । काय्यात जक हे बिचाः याय्माः ।

थजागु हे लकसय् जिमिगु ई फुनांच्वन । आःला जिमि अजि नं मदय् धुंकल । तःधिकम्ह व माहिलिम्ह म्ह्याय् बियाः छवय् नं हथाय् जुइ धुंकल । तर जिमि अबुयात छुं हे च्यूता मदु । अबुया पहः व हे । इपिं ला धमाधम पय्नं जकं वन । सुखया आसं पय्नं वंपिं म्हयाय्मस्तय् ला झन हे दुःख ।
न्हापालिपा हे म्ह्याय्मस्तय्त स्वइ मखुम्ह जिमि अबुं आः पय्नं वंपिंत स्वइगु ला खँ हे मंत । इमित ला स्वापू हे मतल । अझ धाय्माल धाःसा दु हे मकाल । अले जितः नं इमित न्व हे तुइमते न्वः तुयाः जूगु खन धाय् बाकि हे तय्मखु धकाः ख्याच्वः बिल ।

आः छेँ मस्तय्या नामय् जि व जिमि किजा निम्ह जक जुल । जिमि किजायात खर्च बीत धाःसा जिमि अबुया नुगः मस्याः धाःगु पुरय् याइगु अले जितः बीमाल कि ला वां हे चःति वइगु । इलय् ब्यलय् पय्नं नं मवं धकाः न्यंकीगु । ल्यासेया इलय् इहिपा ला याय् मंमदुगु मखुनि, तर अय्सां ततापिनि हबिगत अले थःहे अबुया पहः खनां आः जिं इहिपा याय् मखुगु दृढ निश्चय याना । अबुं न्यंकुगू ध्याच्वःयात मताःछु यानाच्वना ।

न्ह्याथे जूसां जिमि मांया धाःसा साप नुगले स्याः । म्ह्याय्पिन्त खःथाय् ज्यूथाय बी मखनां । एवम् प्रकारं जिमि न्हि वनांच्वन । जिमि अबुया जि आखः ब्वनेगु ला स्वय् हे मयो । अथे जुया फी पुलेत नं थाकुया वल । अथे जुयाः जि थौंकन्हय् जागीर छगू नय् दःसा ज्यू धकाः मालाः जुया । जित धाःसा न्हापा जिं ब्वना तयागु 'द लेडी विथ द लाम्प'य् च्वंम्ह फ्लोरेन्स नाइटेङ्गेलया बाखं जितः मनय् थ्यंक थुं दीगु जुयाः जितः नं सेवा याय्गु ज्या दःसा ज्यू धकाः मनय् लुइकाः ज्या मालाः जुया ।

भाग्यवश जित अस्पतालय् नर्सया ज्या लुयाः वल । जिं थःगु पढाइ व ज्या नापनापं न्ह्याकाः यंका । आःला जिगु बाचलरया पढाइ नं पूवन । अथे जुयाः मफुपिं मनूतय्त सेवा याय्गु ज्याय् हे तन,मन बिया । जित छेँ प्राप्त मजूगु माया थ्व हे ज्या पाखें यक्व दत । जिगु सेवाया भाव खनां ल्वय् लंकाः वंपिं बिरामीतय्सं जित जिमि अबुं मब्यूगु माया बियाः यक्व हे सुभाय् बियाः वंगु दु ।

जिमि किजायात धाःसा आखः ब्वनेगु लकस व खर्चया नं बांलाक व्यवस्था दुगुलिं वं बांलाक ब्वना यंकल । थौं जिमि किजा MBBS ब्वनेया निंतिं जापानय् वनीगु जुयाः जिमि अबु तस्सकं लय्ताः । व जापानय् वनाः मेहेनत यानाः ब्वनाः डाक्टर जुल हँ । बांलाम्ह बिद्यार्थी जुयाः वयात अन हे ज्या बिल धकाः जिमि किजां इमेल छवयाः हल । थ्व खँ न्यनां जिमि अबु ला गुलि लय्ताल गुलि ।

तर थौं गुंपुन्हिया छन्हु न्ह्यो, जि जिगु ड्युटी वने धुंकाः बहनी अथे हे गुता, झिता ति इलय् जिमि अबुया थः काय् नापलाय् मास्ते वयाः कम्प्युटर चाय्काः 'वेबक्यामरा' चाय्काः खँल्हाबल्हा याःबले ला जिमि किजाया जापानय् च्वंम्ह मिसा इहिपा याय् धुन धकाः भौ नापं क्यना हल हँ, अले नेपालय् नं हतपति लिहाँ वय् मखु, लिपा ह्वःताः चू लाःसा जक वय्गु खँ धयाहल हँ । अथे जुयाः जिमि अबुयात तस्सकं नुगले स्यात खनी । थःयात विचाः याइगु म्हगस फुक्क भताभुङ्ग जुल । व हे टेन्सनं यानाः अय्लाः छख्वला त्वनां द्यंम्ह जिमि अबुया हबिगत सुथसिया स्वता ई जूबले ला अथे जुल खनी ।

थौं जिमि अबुं थःया काय् नं मयाःगु ज्या मनं हे मतुनाम्ह म्ह्याय्मचां छेँ कःघानां मिजंतय्सं स्वयां अप्वः छेँ नं अले पिनेया नं ज्या कःघाय्त ताःलागु खनां साप हे लय्ताल । अले थःम्ह बुइकापिं म्ह्याय्मस्त बोझ मखु मालकि इमिसं नं माक्व ज्या याय्फु खनीसा धकाः वाः चाय्कल । अले थःम्ह म्ह्याय्मस्तय्त यानागु व्यवहार प्रति पश्चाताप यासें थौंकन्हय् जिपिं म्ह्याय्मस्तय्त यक्व यक्व माया नं बिल । अले जिगु भविष्य प्रति चिन्ता यासें जित इहिपा नं याय् माः धकाः थुइकल । तर जि इहिपा याय् .... मखु धकाः निश्चय यानाम्हेसिया बौया बचन तय्गु ला मतय्गुला ..... ।

Related Stories

जिगु पूमवंगु म्हसिका [बाखं]

More Stories Like this

बाखं च्वये मखुनी
परिवेश (मुक्तक बाखं)
बायावंगु लँपु
हेँग्वाः जूम्ह मनू
ब्लू-डल बाखं ब्वनेधुंकाः