चलखं ल्हानाः स्वम्ह सित

येँ(सन्ध्या टाइम्स)/मदिक्क वा वयाच्वंगुलिं थौं सुथय् पाल्पाय् चलः वनाः आखः ब्वनाच्वंपिं निम्ह मस्त नापं स्वम्ह मनू सीगु दु। जिल्ला प्रहरीं बिउगु जानकारी कथं चलः वनाः पालुङ मैनादी गाविस वडा नं. १७ या सिर्जना विक व १६ दँया सुनिता विक सीगु खः। इपिं छेँय् च्वनाः आखः ब्वनाच्वंगु इलय् चलः वनाः उपिं च्वनाच्वंगु छेँ समेतं चुइका यंकूगु खः। अथे हे पाल्पाया हे दोभान गाविसया झुसा धइगु थासय् नं चलखं ल्हानाः रुपन्देही मघौलिया गाविस वडा नं. ७ या ३५ दँ दुम्ह धर्मप्रसाद भण्डारी लँय् हे सीगु दु। लु. ५ प १२७ नम्बरया मोटरसाइकलं बुटवलं पाल्पापाखे वनाच्वंगु इलय् लँय् चलः वनाः भण्डारी सीगु खः।
थ्वहे दथुइ पृथ्वी राजमार्गया मुग्लिङ-नौबिसे खण्ड नं चलखं ल्हानाः बन्द जूगु दु। चितवनया दारेचोक गाविस वडा नं. ४ या सिमलधाराय् चलः वनाः ल्वहं समेत कुतुं वयाः लँ अबरुद्ध जूगु खः। उखे नागढुंगाया पातलो वन धइगु लागाय् नं चलः वनाः लँ छखेरं जक चले जुयाच्वंगु दु।