संवैधानिक निकायय् धमाधम नियुक्ति

येँ(सन्ध्या टाइम्स)/सरकारं खाली जुयाच्वंगु थीथी संवैधानिक निकायय् नियुक्तिया ज्या न्ह्याकेत्यंगु दु। उकिया लागिं प्रस्तावित जुयाः वयाच्वंगु थीथी नांयात कयाः थौं नं सरकारय् दुथ्याःगु दलतय् दथुइ सहलह जूगु दु।
सूत्रतय्सं बिउगु जानकारी कथं थौंकन्हय् चर्चाय् वयाच्वंगु अख्तियार दुरुपयोग अनुसन्धान आयोगया प्रमुख आयुक्त पदय् पुलांम्ह कानून सचिव उदय नेपालीयात नियुक्ति याइगु प्रवल सम्भावना दु। अथे हे अख्तियारया आयुक्त पदय् पुलांम्ह प्रहरी अधिकृत अशोक श्रेष्ठ, पुलांम्ह सचिव श्रीकान्त रेग्मीयात नियुक्त याइगु खँ दु। केशव बरालयात न्हापा हे आयुक्त नियुक्त याना तयेधुंकूगु दु।
उखे निर्वाचन आयोगया प्रमुख आयुक्त पदय् रामकृष्ण श्रेष्ठयात नियुक्त याइगु सम्भावना दु। छुं जुयाः श्रीकान्त रेग्मीयात अख्तियारय् तये मफुत धाःसा लोकसेवा आयोगय् यंके फुगु खँ नं सूत्रं धाःगु दु।
नेवानिया कर्मचारी चकित
थ्वहे झ्वलय् नेपाल वायुसेवा निगमया कार्यकारी प्रमुख दयेकाः साहित्यकार मनरुप नेप्च्युनयात नियुक्त याना हःगु खनाः अनया कर्मचारीत चकित जुयाच्वंगु दु। कर्मचारीत थौंकन्हय् मनरुपया 'बायोडाटा' मुंकेगु ज्याय् व्यस्त जुयाच्वंगु दु। थौं नेवानिया बुन्हिया लसताय् एकेदमिइ जुयाच्वंगु समारोहय् नकतिनि चीकूम्ह अध्यक्ष सुगतरत्न कंसाकार वयाच्वंगु दुसां महाप्रवन्धक केवी लिम्बु धाःसा मवःगु खँ सीदुगु दु।