जनप्रतिनिधि परिषद्यात विरोध

येँ(सन्ध्या टाइम्स)/संविधानसभाय् दुथ्याःगु मूमू स्वंगू राजनीतिक दल माओवादी, कांग्रेस व एमालेया शीर्ष नेतातय् दथुइ जूगु सहमति कथं स्थानीय निकायय् जनप्रतिनिधि परिषद् गठन यायेगु तयारीयात संविधानसभाया चीधंगु दलतय्सं विरोध याःगु दु।
वइगु साउन १ गतेनिसें हे लागू जुइकथं संविधानसभाया चुनावय् ३ प्रतिशत तक मत हःगु पार्टीयात स्थानीय निकायया जनप्रतिनिधि परिषद्य् दुथ्याकेगु प्रावधान तःगुलिं चिचीधंगु दलं विरोध याःगु खः।
थौं सुथय् नेकपा (एकीकृत)या महासचिवव रामसिंह श्रीषं 'सन्ध्या टाइम्स'लिसे खँल्हासें थुकियात स्वंगू दलया सर्वसत्तावादया नमूना खः धयादिल। वय्कलं धयादिल, 'यदि उकथं स्थानीय निकाय परिषद गठन यात धाःसा आन्दोलनय् वनेगु जुइ।'
अथे हे चुरेभावर राष्ट्रिय पार्टीया अध्यक्ष नापं सभासद् केशव प्रसाद मैनालीं नं चीधंगु दलतय्त समाप्त यायेगु खेल कथं तःधंगु दलतय्सं अथे याःगु द्वपं बिसें उकिया विरुद्ध न्ह्याः वनेत चीधंगु दलतलिसे थनिंनिसें हे सहलह ब्याकेगु खँ कनादिल।
राष्ट्रिय जनमोर्चाया अध्यक्ष नापं सभासद् चित्रबहादुर केसीं म्याद फुइधुंकूगु लाइसेन्स क्यनाः तःधंगु दलतय्सं स्थानीय निकाय कब्जा यायेत हे थ्व खेल म्हितूगु खः धासें उकियात थःपिंसं स्वीकार यायेगु जुइ मखु धयादिल। अथे हे नेमकिपां नं स्थानीय निकायसं जनप्रतिनिधि परिषद् गठन यायेत्यंगुया विरोध याःगु दु। सरकारं छवाःया दुने हे स्थानीय निकायय् अनियमितता जुयाच्वंगु, जनताया ज्या मजुयाच्वंगु धासें उकथंया जनप्रतिनिधि परिषद् गठन यायेगु तयारी याःगु दु।