६ लेनया सतकं थिमि डुबे जुल

थिमि (सन्ध्या टाइम्स)/थौं चछि वःगु वां थिमिया पुलांगु लँय्पाखे लाःगु आपालं छेँ व नकतिनि वा पी सिधःगु बुँ लखय् डुबे जूगु दु। वां थःपिनि छेँ व बुँ डुबे जूगुलिं तम्वःपिं स्थानीय मनूत सतकय् कुहां वयाः विरोध यासें उगु लागाय् लँ नं पना बिउगु दु। न्हापा न्हापा अन न्ह्याक्व हे वा वःसां थथे छेँबुँ डुबे मजू, थुगुसी न्हूगु लँय् ६ लेनया सतक दयेके सिधयेवं हे थथे डुबान जूगु खः धासें स्थानीय जनतां थुकिया दोष ६ लेन लँयात बिउगु दु ।

६ लेनया लँ दयेकूबलय् लँया सिथय् सिथय् तसकं चिबाला जुइक धः दयेकूगु कारणं अन मन्ह्यंगु लः बुँइ दुहां वःगु खँ स्थानीय मनूतय्सं धाःगु दु। उकिं ६ लेन लँया धः बांलाक दयेका बी माल धइगु माग यासें स्थानीय जनतां विरोध प्वंकूगु खः। पुलांगु थिमिया निकोसेरा लागाय् अथे डुबान जूगु खःसा उकिं यानाः अन च्वंगु छेँय् छतँजाः धइथें लः दुहां वयाच्वंगु दु। लँ सिथय् च्वंगु छगू टहरा नं दुना वःगु दुसा लः दुहां वयाः ब्वनेज्याय् नापं लिच्वः लाःगुलिं उगु लागाय् लाःगु स्कूलत नापं बन्द याःगु दु ।

लः बाः वयाः नकतिनि वा पी सिधःग बुँ पूरा हे जलमग्न जूगु दुसा सतक तकं लखं त्वपुयाच्वंगुलिं न्यासि जुइत समेत थाकूया च्वंगु दु । तम्वःपिं स्थानीय मनूतय्सं पं तयाः लँ पना बिउगुलिं अन सतक जाम जगू खः । लिपा प्रहरी वयाः वार्ता यायेत थिमि नगरपालिका ब्वना यंकूगय ख: । थ्व ध्व च्वयाच्वंगु इलय् तक उमि दथुइ वार्ता जारी दनी ।