एम्बुलेन्स तोडफोड

येँ(सन्ध्या टाइम्स)/कोशी राजमार्ग अन्तर्गत सुनसरी हाँसपोसाया पानीपिया धइगु थासय् थौं सुथ् न्हापां म्हमसिउपिं छपुचः मनूतय्सं चालकयात आक्रमण यानाः अन हयाच्वंगु छगः एम्बुलेन्स तोडफोड याना बिउगु दु। विराटनगरं वीपी कोइराला स्वास्थ्य विज्ञान प्रतिष्ठान धरानय् विरामी तयाः लिहां वयाच्वंगु को. १ २७१७ नम्बरया एम्बुलेन्सया चालक इटहरीया बिनोद पौडेलयात आक्रमण यानाः एम्बुलेन्स तकं तोडफोड याना वंगु खँ प्रहरीं धाःगु दु। सुथ न्हापां ४ बजे एकान्त थासय् मोटरसाइकलं वःपिं निम्हेस्यां लँ पनाः मोटरसाइकल बेथां दिकाः चालकयात आक्रमण यानाः अथे एम्बुलेन्स तकं तोडफोड याना वंगु खः धकाः प्रहरी चौकी हाँसपोसाया प्रमुख सई हरि प्रसाई नं जानकारी बियादीगु दु।
आक्रमणय् लानाः घाःपाः जूम्ह चालक पौडेलयाके दुगु प्यद्वः तका ध्यबा नं इमिसं लुटे याना यंकूगु खः। घाःपाः जूम्ह चालकयात सामुदायिक स्वास्थ्य केन्द्र इटहरीइ वासः यायेगु ज्या जुयाच्वंगु दु। आक्रमणकारीतय्त धाःसा प्रहरीं मालाच्वंगु दु।