माओवादी बैठक च्वने हे मफुत

येँ(सन्ध्या टाइम्स)/स्वन्हु लिपा च्वनेगु धकाः स्थगित यानातःगु माओवादीया केन्द्रीय बैठक थौं खुन्हु दयेधुंकलं नं च्वने फयाच्वंगु मदु। माओवादी बैठक च्वने मफुगु कारणं यानाः सेना समायोजन, संविधान च्वयेगु लगायतया मेमेगु ज्या नापं ठप्प जुयाच्वंगु दु।
सूत्रं बिउगु जानकारी कथं सेना समायोजन यायेगु मोडालिटी गय् यानाः तयार यायेगु धइगु खँय् पार्टी अध्यक्ष प्रचण्ड व उपाध्यक्षपिं मोहन वैद्य व डा. बाबुराम भट्टराईपिनि दथुइ कानाच्वंगु कारणं यानाः पार्टीं छुं हे निर्णय याये मफयाच्वंगु खः। थ्व विषययात थवंथः हे च्वनाः निं समाधान याये, वयां लिपा जक केन्द्रीय बैठक च्वनेगु धकाः बैठक लिछ्याना च्वंगु खःसां थ्व विषयय् थवंथः नं छुं हे सहमति जुइ मफयाच्वंगु खँ धाःगु दु। छुं सहमति हे मजुइक केन्द्रीय बैठक च्वन धाःसा उकिं छुं हे लिच्वः पिकाइगु सम्भावना मदुगुलिं न्हापां सहमति निं याये धकाः आन्तरिक रुपं संवाद न्ह्याकाच्वंगु दु। तर निम्ह उपाध्यक्ष व प्रचण्डया दथुइ छुं हे सहमति जुइ फयाच्वंगु मदु। सहमतिया कुतः विफल जुजुं वनाच्वंगुलिं अध्यक्ष प्रचण्डं ला थः उपाध्यक्षपिंत आः छता निता जक मखु माल धाःसा फुक्क हे विषयय् सहलह यायेत नं थः तयार दु धकाः लिसः बियाछ्वःगु खँ सीदुगु दु।
सेना समायोजन, संविधान निर्माण व राज्य पुनर्संरचना बारे माओवादीं छुं निर्णय याये मफुगु कारणं यानाः थुकियात कयाः दयेका तःगु थीथी समितितय्गु बैठक तकं न्ह्याये मफयाच्वंगु खँ सूत्रं धाःगु दु। सेना समायोजनया बारे नेपाली सेनां छ्वया हःगु प्रस्तावयात छुं भचा भिंकाः स्वीकार यायेत अध्यक्ष प्रचण्ड तयार दुसां मोहन वैद्य धाःसा माओवादी लडाकुया पोजिशन, पद व प्रवेश जुइगु तरिका स्पष्ट मजुइकं उकियात स्वीकार यायेगु पक्षय् मदु।
अथे हे प्रचण्डं संविधान निर्माणया विवाद समाधान याना वनेगु नामय् धमाधम निर्णयत याना वंगु खँय् नं वैद्य पक्षं विरोध यानाच्वंगु दु।
माओवादी दुनेया थ्व अन्तरविरोधं यानाः बिया तःगु ईया दुने सेना समायोजन व संविधानया मस्यौदा तयार याये मफइगु स्थिति वःगु दु।