समावेशी विधेयक हयेत सभामुखं हे पहल याना बीगु

येँ(सन्ध्या टाइम्स)/संसदपाखें निलम्बित प्यम्ह सभासद्तय्सं माग यानाच्वं कथं समावेशी विधेयक हयेगु लागिं आः सभामुख सुभाष नेम्बाङ थम्हं हे पहल यायेगु बचं बियादीगु दु। थःपिंत निलम्बन याःगु बारे वय्कः लिसे खँ ल्हाः वंपिं निलम्बित सभासद्तलिसे खँ ल्हासें सभामुख नेम्बाङं थ्व खँ धयादीगु खः।
उगु विधेयक हयेगु ज्या अझ नं मजूनिगु कारणं थःपिंसं हानं नं सदन दुने नाराबाजी यायेमाली धकाः धाःगु इलय् सभामुख नेम्बाङं आः उगु विधेयक पेश याकेत थम्हं हे पहल यायेगु बचं बियादीगु खः।
सभामुख नेम्बाङं थ्व ज्याय् पहल यायेत थःत झिंन्यान्हुया ई बिउ धाःगुलिं आः थःपिंसं झिंन्यान्हु तक सदनय् छुं नं ज्याखँ मयायेगु जानकारी सभामुख बुद्ध साय्मिं बियादीगु दु।
थ्व झिंन्यान्हु तक आः वय्कः सभासद्त आवद्ध जुयाच्वंगु राजनीतिक पार्टीतय्सं तराईया थीथी थासय् वनाः कार्यक्रमत यायेगु ज्याझ्वः दयेकूगु दु।
थ्वहे झ्वलय् मेखे थःपिंत याःगु निलम्बनया विरोधय् वय्कःपिंसं सर्वोच्च अदातलय् तयादीगु रिटयात कयाः नं वहस शुरु जूगु दु। न्हापा सर्वोच्चय् उगु रिट दर्ता हे जुइ मखु दरपिठ याना हःगु खःसा लिपा दरपिठ विरुद्ध नं रिट तयाः त्याकाःलि मुल मुद्दाय् वहस न्ह्याकूगु खः। थुकी ततःधंगु राजनीतिक पार्टीलिसे आवद्ध वरिष्ठ अधिवक्तातय्सं नं निलम्बित सभासद्तय् पक्षं वहस याःगुलिं थ्व रिट कानून व्यवसायीतय् दथुइ नं रुचीया विषय जुयाच्वंगु दु। दरपिठ विरुद्धया रिटय् २५ म्ह वकिलतय्सं वय्कःपिनि पक्षं वहस याःगु खः। कानूनविद्तय्सं धाः कथं छुं जुयाः निलम्बन याःगु निर्णय अवैध धकाः फैसला जुल धाःसा उगु न्हय्न्हुया दुने संसदं याःगु मेमेगु ज्याखँ नं अवैध ठहर जुइ।