बेलायतय् नेपाःमितय्त सांघातिक हमला

येँ(सन्ध्या टाइम्स)/बेलायतय् विदेशीतय्त याना हःगु सांघातिक हमलां अनया नेपाःमित ग्याका च्वनेमाःगु अवस्था वःगु दु। अनया अल्डरसट व फार्नवोरो क्षेत्रय् थौंकन्हय् नेपाःमितय्त सांघातिक याइगु घटना अप्वया वःगु दु। वंगु जुन ४ कुन्हु बहनी नं टोटल्यान्डय् छथ्वः हतियारधारीतय्सं आक्रमण याःगु दु। उकी लानाः स्वम्ह नेपाःमि घाःपाः जूगु दुसा आक्रमण याःगु आशंकाय् छुं मनूतय्त ज्वंगु दु। अथे हे मई ३१ कुन्हु नं म्युनिसिफ गार्डेन्स्, अल्डरसटय् अथे हे २० म्ह ति तुयूपिं ल्याय्म्हतय्सं नेपाःमितय्त आक्रमण याःगु दु। उगु घटनाय् नेपाःमितय्त बाम्ह सिक्क दाःगु खः। उगु घटना जातीय भेदभावं प्रेरित खनेदुगु आशंका प्रहरीं याःगु दु। उकथं मई ३० कुन्हु सुथय् नं छथ्वः नेपाःमि तुयूपिं ल्याय्म्हतय् दथुइ ल्वापु जूगु खः। मई २९ कुन्हु चान्हय् चेरिउड एभिन्यु, फार्नबोरोय् नं उज्वःगु हे आक्रमण जूगु खः। अथे लगातार जूगु आक्रमणया घटनां नेपाःमित बहनी पिहां जुइत हे ग्यानाच्वंगु खँ धाःगु दु। थुकियात कयाः अनया सरोकारवालातलिसे सहलह जुइधुंकूगु दुसा आः वइगु जुलाई ८ कुन्हु नेपाली समुदायया प्रमुखतलिसे सहलह ब्याकीगु जूगु दु।